Qazaqstan jáne Qazsport telearnalary ÝEFA Chempıondar lıgasy, Eýropa lıgasy jáne Konferensııa lıgasynyń oıyndaryn kórsetedi, dep habarlaıdy Egemen.kz.
«Qazaqstan» teleradıokorporasııasy fýtboldan UEFA EURO 2020 Eýropa chempıonatynyń kórsetiliminen keıin fýtbol jankúıerlerin taǵy da qýantpaq. Bul joly korporasııa ÝEFA Chempıondar lıgasy, Eýropa lıgasy jáne Konferensııa lıgasynyń oıyndaryn Qazaqstan Respýblıkasynyń aýmaǵynda kórsetý quqyǵyna ıe boldy. Qazaqstan jáne Qazsport telearnalary Eýropanyń eń úzdik klýbtarynyń 2021/2022 maýsymyndaǵy tartysty matchtaryn kórsetedi», delingen korporasııa aqparatynda.
Bıyl ÝEFA-nyń jańa klýbtyq týrnıri - Konferensııa lıgasy quryldy. Oǵan Almatynyń «Qaırat» klýby qatysady. «Qaırat» óz tarıhynda eýrokýboktyń toptyq kezeńine alǵashqy ret shyǵyp otyr. Qazaqstandyq komanda H tobynda Shveısarııanyń «Bazel», Ázerbaıjannyń «Karabah» jáne Kıprdyń «Omonııa» komandalarymen pleı-off joldamasy úshin synǵa túsedi.