Qazaqstan elshisi Bolat Imanbaev Armenııa Syrtqy ister mınıstri Ararat Mırzoıanmen kezdesý ótkizdi, dep habarlaıdy Egemen.kz.
Suhbat barysynda qazaqstan-armıan yntymaqtastyǵy jáne eki eldiń syrtqy saıası vedomstvolary arasyndaǵy ózara is-qımyl máseleleri talqylandy.
Mınıstr Erevannyń Nur-Sultanmen dıalogty barlyq deńgeılerde, ekijaqty formatpen qosa ortaq ıntegrasııalyq birlestikter men halyqaralyq uıymdar sheńberinde de jandandyrýǵa múddeli ekenin málimdedi. A. Mırzoıan zor áleýeti men ósý perspektıvasy bar saýda-ekonomıkalyq yntymaqtastyqty tereńdetýdiń mańyzdylyǵyn atap ótti.
Taraptar Armenııa Prezıdenti Armen Sarkısıannyń 2021 jyly maýsym aıyndaǵy Qazaqstanǵa saparynyń qorytyndylaryn, sondaı-aq 26 mamyrdaǵy Ekonomıkalyq yntymaqtastyq jónindegi qazaqstan-armıan úkimetaralyq komıssııasynyń 8-shi otyrysynyń jáne 20 sáýirdegi syrtqy ister mınıstrlikteri arasyndaǵy saıası konsýltasııalardyń ýaǵdalastyqtaryn iske asyrý máselelerin talqylady.
Elshi armıan tarapyn Prezıdent Qasym-Jomart Toqaevtyń «Halyq birligi jáne júıeli reformalar – el órkendeýiniń berik negizi» atty Qazaqstan halqyna Joldaýynyń negizgi qaǵıdalarymen, sonymen qatar memleketimizdiń áleýmettik-ekonomıkalyq jańǵyrýynyń ózekti baǵdarlamalary men halyqaralyq bastamalary týraly habardar etti.