Mańǵystaý oblysynda Memleket basshysynyń Joldaýyn iske asyrý baǵyttary belgilendi. Memleket basshysy belgilegen birinshi mindet – pandemııadan keıingi el ekonomıkasyn damytý. Bul baǵytta óńir ekonomıkasyn ártaraptandyrý boıynsha júıeli jumys istelip, negizinen óńdeý ónerkásibi, týrızm, qurylys, aýyl sharýashylyǵy men kólik jáne logıstıka salalaryn damytýǵa basymdyq berilýde.
2025 jylǵa qaraı oblystaǵy óńdeý ónerkásibiniń kólemin 254,3 mlrd teńgege deıin arttyrý josparlanǵan. Kózdelgen mejege qol jetkizý úshin óńir ekonomıkasyna tikeleı ınvestısııa tartý, óńdeý ónerkásibin damytý boıynsha jumystar jandanbaq.
Oblysqa ınvestor qarjysyn tartýda Aqtaý arnaıy ekonomıkalyq aımaǵynyń úlesi zor. Arnaıy ekonomıkalyq aımaǵy ashylǵaly 200 mlrd teńgeden astam ınvestısııa quıylǵan. Búginde bul aımaqta 19 óndiris oshaǵy jumys istep tur. Onda 1 800-ge tarta adam eńbek etýde. Aldaǵy ýaqytta sheteldik jáne otandyq ınvestorlardyń qatysýymen taǵy 14 joba júzege asyrylmaq. Onyń 5-eýi bıyl iske qosylady.
Sondaı-aq Prezıdent Joldaýy Mańǵystaýda jańa ken oryndarynyń ashylýyna da tyń serpin bermek. Memleket basshysy geologııalyq barlaý jáne jer qoınaýyn keshendi zertteýdi tapsyrdy. Bul baǵytta О́zen, Jetibaı, Qalamqas jáne taǵy da basqa ken oryndarynda geologııalyq barlaý jumystary júrgizilmek. Atalǵan bastama búginde oblysta ázirlenip jatqan áleýmettik-ekonomıkalyq damý keshendi josparyna endi. Bul aımaqtaǵy munaı qoryn anyqtaýǵa, munaı men gaz óndirý kólemin ulǵaıtýǵa jáne munaı kompanııalaryna qyzmet kórsetetin mekemelerdiń jumys kólemin arttyrýǵa múmkindik bermek.
Mańǵystaýlyqtar úshin Joldaýda aıtylǵan taǵy bir jańalyq Astrahan-Mańǵystaý» magıstraldy sý qubyrynyń jańǵyrtylýy.
Elimizde 2030 jylǵa qaraı sý tapshylyǵynyń kólemi 40 paıyzǵa jetýi múmkin. Atalǵan máseleniń aldyn alý úshin Prezıdent Qasym-Jomart Toqaev jańa Joldaýynda atqarýshy organdarǵa naqty tapsyrmalar júktedi. Memleket basshysy «Astrahan-Mańǵystaý» magıstraldy sý qubyrynyń jańǵyrtylatynyn jáne Kendirlide sý tushytý zaýytyn salý qajettigin aıtty.
Quzyrly oryndardyń aqparatyna súıensek, óńirde qazir bul zaýyttyń jobalyq-smetalyq qujattamasy jasaqtalýda. Quny 87 mlrd teńge bolatyn joba táýligine 50 myń tekshe metr sý tushytady dep josparlanyp otyr. Kásiporyn iske qosylǵanda Jańaózen qalasy turǵyndaryn taza aýyz sýmen qamtyp, qalanyń tirshilik nárine degen suranysyn tolyq ótemek.
Mańǵystaýlyqtar úshin aýyz sý máselesi óte ózekti, ásirese jaz aılarynda sý tóńireginen shý ketken emes. Aqtaý qalasy jáne oǵan irgeles ornalasqan Munaıly, Qaraqııa aýdandarynyń aýyldaryn aýyz sýmen jetkilikti deńgeıde qamtamasyz etý maqsatynda «Kaspıı» sý tushytý zaýytynyń qýatyn eki ese, ıaǵnı 40 myń tekshe metrge deıin ulǵaıtý kózdelgen edi. Qazir osy baǵyttaǵy jumys júrgizilýde. Jobany 2022 jyldyń basynda aıaqtaý josparlanǵan.
«QazMunaıGaz» ulttyq kompanııasy «Qarajanbas» ken ornynda táýligine 17 myń tekshe metr sý tushytatyn zaýyt salýda. Bul zaýyt bıyl jyl sońyna iske qosylady dep kútilýde. О́ndiristen aýysqan sý turǵyndardyń qajetine alynatyn bolady.
«MAEK-Qazatomónerkásip» JShS-ne qarasty táýligine 24 myń tekshe metr sý tushytatyn qondyrǵysyn salý josparlanǵan. Qazir jobalyq-smetalyq qujattamasy jasaqtalýda. Qujat tolyq rásimdelip bitkennen keıin jobany keler jyly bastaý kózdelgen.
Fort-Shevchenko qalasynda qýaty táýligine 5 myń tekshe metrdi quraıtyn sý tushytý qondyrǵysyn NKOK kompanııasynyń oblys úshin áleýmettik qoldaý aıasynda iske asyrý josparlanyp otyr. Dál osyndaı joba Aqshuqyr jáne Saıyn Shapaǵatov eldi mekenderinde de salynady. Túpqaraǵan aýdanyna qarasty Aqshuqyr aýylynda teńiz jaǵalaýynda 8 qudyq iske qosyldy.
Munaıly aýdanyndaǵy Baıandy aýylynda ótken aıda táýligine 3 myń tekshe metr sý tushytatyn membrana iske qosyldy. Budan bólek, Baıandy aýylynda qazir táýligine myń tekshe metrge deıin sý tushytatyn membrana jumys istep tur. Aqpan aıynyń basynda iske qosylǵan membrana «Quıylys» jerasty sý ken ornynan kelgen sýdy tushytady. Búginde ol Baıandy aýylyn aýyz sýmen qamtamasyz etip otyr.
«Sonymen qatar «Quıylys – Munaıly – Aqtaý» baǵytynda jańa sý qubyry tartylady. О́ńirdegi sý kózderin izdestirý-zertteý jumystary qolǵa alyndy.
Joldaýda Memleket basshysy halqymyzdyń ál-aýqatyn arttyrýǵa arnalatyn 5 negizgi bastamany belgiledi. 2022 jyldyń 1 qańtarynan bastap eń tómengi jalaqy mólsheri 42 500 teńgeden 60 myń teńgege deıin kóbeıetin boldy. Eńbekaqynyń ósýi 19 365 mańǵystaýlyq turǵynǵa oń áserin tıgizbek. Sonymen qatar Mańǵystaý oblysy boıynsha 52 myńnan astam azamattyq qyzmetshilerdiń (mádenıet qyzmetkerleriniń, muraǵatshylardyń, kitaphanashylardyń, tehnıkalyq qyzmetkerlerdiń, qoryqshylardyń, kólik júrgizýshileriniń) eńbekaqysy 2022 jyldan 2025 jylǵa deıin 20 paıyzǵa ósetin boldy.
Joldaýda zııaly qaýym ókilderine artylar júktiń zor ekeni de aıtyldy. Qazirgi ǵalamtor dáýirinde ósip kele jatqan urpaqqa mádenıettilik, otanshyldyq, bilimge qushtarlyq, eńbekqorlyq sııaqty qasıetterdi dáripteýde ult zııalylarynyń róli zor.
Mańǵystaý oblysy