«Qaıyrymdy ister marafony» jalpyulttyq jobasynyń qatysýshylary kúzgi jaqsylyq kúnin merekeleý aıasynda «Mektepke jol» aksııasyna qatysty. Aksııany Qazaqstannyń isker áıelder qaýymdastyǵy uıymdastyrdy.
Kóp balaly jáne az qamtylǵan otbasylardan, sondaı-aq erekshe qajettilikteri bar balalardy tárbıelep otyrǵan otbasylardan shyqqan júzden astam bala shamamen 1 mln teńge somada ataýly kómekpen qamtyldy.
Aksııa Shyǵys Qazaqstan, Pavlodar, Mańǵystaý, Aqmola jáne Atyraý oblystarynda ótti. Osylaısha, áleýmettik sebep boıynsha mektepke kelmeýdiń aldyn alý maqsatynda jańa oqý jyly qarsańynda jergilikti oqýshylarǵa jasyna qaraı jeke tańdalǵan mektep formasy men rıýkzaktar, keńse taýarlarynyń jıyntyǵy, sondaı-aq aqshalaı sertıfıkattar syıǵa tartyldy.
«Aksııanyń maqsaty barlyq qajetti zattardy – kıim-keshekti, rıýkzakty, keńse taýarlaryn jáne basqa qajettilikterge belgili bir somany jınaý jáne ony otbasylary qıyn turmystyq jaǵdaıǵa tap bolǵan balalarǵa usyný boldy. Bıyl balalarǵa arnalǵan jańa oqý jyly oflaın rejimde ótedi. Sondyqtan áleýmettik sebepter boıynsha balalardyń mektepke kelmeýiniń aldyn alý maqsatynda biz kúzgi jaqsylyq kúnin merekeleý aıasynda aksııaǵa bastamashy boldyq», dedi Qazaqstannyń isker áıelder qaýymdastyǵynyń prezıdenti Raýshan Sársembaeva.
Aksııany ÚEU, Qazaqstan halqy Assambleıasynyń ókilderi, iri kásiporyndar jáne basqa da demeýshiler, mesenattar qoldady.
Eske sala keteıik, «Qaıyrymdy ister marafony» jalpyulttyq jobasy osy jyldyń aqpan aıynda Memleket basshysy Qasym-Jomart Toqaevtyń bastamasymen Qazaqstan Táýelsizdiginiń 30 jyldyǵyn merekeleý aıasynda bastalǵan bolatyn. Joba Aqparat jáne qoǵamdyq damý mınıstrliginiń jáne Azamattyq bastamalardy qoldaý ortalyǵynyń muryndyq bolýymen júzege asyrylýda.
Jyl basynan beri marafonǵa 2,5 mln-nan astam adam qatysyp, 202 myńǵa jýyq azamat ataýly kómek aldy. Marafonǵa kez kelgen adam qatysa alady
«Egemen-aqparat»