Qatonqaraǵaı aýdany Aqqaınar aýylynyń janynda ornalasqan Shý qorymyn zertteý barysynda ár túrli jer ústi qurylysy bar elýden asa jerleý kezindegi ǵuryptyq eskertkishter shoǵyrlanǵany anyqtaldy, dep habarlaıdy Egemen.kz «Berel» memlekettik tarıhı-mádenı qoryq-mýzeıiniń baspasóz qyzmetine silteme jasap.
«Obalar temir dáýiriniń erte kezeńine jatady», deıdi mamandar.
Mundaı boljam jasaýǵa obadaǵy jerleý ǵurpy negiz bolǵan. Obanyń qabir shuńqyrynda eki kisiniń máıiti qoıylǵan, birinshisi - qarý-jaraq asynǵan iri deneli er adam. Qarýlardyń ishinde qola qanjary jáne qoladan jasalǵan chekan bar.
Sonymen qatar jebelerdi salatyn qoramsaq, beldikke iletin qola ilmegi bar. Jebeleriniń ushtary súıekten jasalǵan. Al, qalǵandary qola. Bul jerde qarýlardyń shynaıy emestigin aıta ketý kerek, sebebi qarýlar kishigirim kólemde jasalǵan.
Ekinshi máıit er adamnan keıin jerlengen. Onyń kólemi kishileý. Jambas tusyna teri, qaltaǵa salynǵan qola aına qoıylǵan.
Máıittermen birge qysh ydystary jáne qoıdyń quıymshaǵy qoıylǵan. Qysh ydystardyń erneýinde órnekteri bar.
Aqqaınar aýylynda júrgizilip jatqan arheologııalyq qazba jumystarynyń jetekshisi belgili arheolog - Zeınolla Samashev.