Bul suraqqa Úkimet otyrysynda Energetıka mınıstri Maǵzum Myrzaǵalıev jaýap berdi, dep jazady Egemen.kz.
«Energetıkalyq kásiporyndardyń kúzgi-qysqy kezeńge daıyndyǵy jalǵasyp jatyr. Júıelik operator bekitken kestege sáıkes elektr stansalardaǵy 4 energoblok, 18 qazan, 19 týrbına jóndeldi. Al 2 energoblok, 25 qazan men 16 týrbınany jóndeý jumystary jalǵasyp jatyr. Búgingi kúni jospar boıynsha 20 464 km elektr berý jelileriniń 16 773 km jóndeldi, sondaı-aq 462 qosalqy stansanyń 316-sy qalpyna keltirildi», dedi mınıstr.
Aıtýynsha, bul jeliler boıynsha jyldyq jospardyń 67%-yn, al qosalqy stansalar boıynsha 68%-yn quraıdy.
«Atyraý, Qaraǵandy, Pavlodar, Soltústik Qazaqstan oblystarynda elektr stansalarynyń negizgi jabdyqtaryn jóndeý merzimderi saqtalmaǵan. Atomdyq jáne energetıkalyq qadaǵalaý men baqylaý komıteti oblys ákimdikterimen birlesip, energetıkalyq kásiporyndardyń aldaǵy jylytý maýsymyna daıyndyǵyna turaqty baqylaý júrgizdi. Sonymen birge elektr stansalaryndaǵy jóndeý jumystaryn ýaqytyly aıaqtaý boıynsha sharalar qabyldap jatyr», dep baıandady Myrzaǵalıev Úkimette.
Mınıstr baıandaǵandaı, jergilikti atqarýshy organdardyń aqparaty boıynsha ortalyqtandyrylǵan jylýmen jabdyqtaý aımaǵyndaǵy 485 qazandyqty jylytý maýsymyna daıyndaý úshin 1 209 qazannyń 925-ine jóndeý júrgizildi.
«Aqmola, Shyǵys Qazaqstan, Soltústik Qazaqstan jáne Almaty oblystary boıynsha jospardan artta qalyp keledi. Bul aldaǵy jylytý maýsymynyń senimdi ótýine qaýip tóndiredi», dep tolyqtyrdy Energetıka mınıstri.