Elimizde kómir baǵasy óńirlerge baılanysty tonnasyna 5 myńnan 19 myń teńgege deıin aýytqıdy. Bul týraly Úkimet otyrysynda QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy Egemen.kz.
«Kómir baǵasy naryqtyq qatynasta qalyptasatynyn jáne memleket tarapynan rettelmeıtinin aıta ketý qajet.
Ákimdikterdiń aqparaty boıynsha óńirlerdegi kómirdiń quny tonnasyna 5 myń teńgeden 19 myń teńgege deıin ózgeredi. Bul eń aldymen kómirdiń markasyna, óndirý shyǵyndary men jetkizý qashyqtyǵyna baılanysty», dedi mınıstr.
Onyń atap ótýinshe, aldaǵy jylytý maýsymynda kommýnaldyq-turmystyq jáne turǵyndar úshin qajetti kómir kólemi shamamen 9,2 mln tonnany quraıdy. Onyń ishinde kommýnaldyq-turmystyq sektorǵa - 2,8 mln tonna, halyqqa 6,4 mln tonna kómir qajet.