Á.Qasteev atyndaǵy Memlekettik óner mýzeıiniń Ortalyq kórme zalynda qalalyq «Samosvety» klýbynyń qurylǵanyna 50 jyl tolýyna arnalǵan «Qazaqstan ónerindegi esimder» atty mereıtoılyq sýret kórmesi ashyldy.
1971 jyly Almaty oblystyq kásipodaqtar keńesi óńirlik ónerpaz sýretshiler birlestigin quryp, oǵan «Samosvety» degen at bergen kezden bastap óner áleminde óz súrleýin qalyptastyrǵan ujymnyń tarıhy bastaldy. Keıinirek belgili bolǵandaı, 400-den astam sýretshiniń shyǵarmashylyq uıasyna aınalǵan bul uıym KSRO-daǵy eń iri óner ujymdarynyń biri boldy. Sýretshilerdi biriktirgen – ózderiniń ónerge degen súıispenshiligi men jasampazdyqqa degen umtylysy. Aıtalyq, «Samosvettiń» ózi Búkilodaqtyq, Respýblıkalyq, Halyqaralyq kórmeler men festıvaldarǵa qatysyp, onyń quramyndaǵy sýretshiler – osy kórmelerdiń laýreattary atandy. 1974 jyly jazda «Samosvety» ókilderi delegasııasy KSRO halyqtary óneriniń úlken merekesine qatysyp, altyn dıplommen marapattalǵany kópshilikke jaqsy tanys.
– Búginde «Samosvety» jaıly bireý bilse, bireý bilmeıdi. Alaıda ónertanýshylar men basqa da zertteýshiler keńestik kezeńniń halyqtyq kórkemónerpazdar beıneleý óneri sııaqty erekshe qubylysyna qyzyǵýshylyq tanytyp, osy másele boıynsha óz sózderin aıtatyn ýaqyty keledi degen senimdemin. Keńes Odaǵy kúıregennen keıin «Samosvety» sııaqty úlken shyǵarmashylyq birlestiktiń de jumysy toqtap qaldy. Alaıda Almaty qalasynyń sýretshileri ózara kezdesýdi jalǵastyra berdi. 2004 jyly G.S.Korjınskaıa basqaratyn Almaty múgedek balalardy ońaltý ortalyǵy klýbqa jumys isteý úshin óziniń májilis zalyn usyndy. Sol jyly Almaty sýretshileri jınalystarynyń birinde birlestikti Almaty qalalyq beıneleý óneri áýesqoılarynyń «Samosvety» klýby etip qaıta qurýdy uıǵardy. Búgingi tańda klýb quramyna jaqyn qalalar men oblystardyń sýretshileri kirip otyr. Sondaı-aq, bizdiń birlestikte arnaıy bilimi bar kóptegen sýretshi-pedagogter men basqa mamandyqtaǵy adamdar bar. Klýb sýretshileri 50 jyldan beri jınalyp keledi, qalanyń túrli galereıalary men kórme zaldarynda toptyq jáne jeke kórmelerin uıymdastyryp júr. Birlestik qyzmetine qyzyǵýshylyq tanytqandar úshin bizdiń esigimiz árqashan ashyq, – deıdi «Samosvety» klýbynyń tóraǵasy, sýretshi-pedagog Natalıa Kýharenko.
О́ner ujymynyń jetekshisi tilge tıek etkendeı, shyǵarmashyl toptyń qataryna ózine qolaıly orta izdegen jas kásibı sýretshiler aǵylyp kele bastaǵan. Al olardyń qalam-qýatyn tanytatyn óner jármeńkesine 110-nan astam keskindemelik, grafıkalyq shyǵarmalar men sándik-qoldanbaly óner týyndylary qoıylǵan.
ALMATY