Soltústik Qazaqstan oblysynyń polıseıleri erekshe qorǵalatyn tabıǵı aımaqta zańsyz ań aýlaǵan kúdiktilerdi ustady, dep habarlaıdy Egemen.kz.
«Qyzyljar aýdanynda 14 qyrkúıekke qaraǵan túni Sogorovka qoryqshasynyń aýmaǵynda tabıǵatty qorǵaý polısııasynyń aǵa ınspektory, qoryqshanyń bas ańshysy jáne «Kókshetaý» memlekettik ulttyq tabıǵı parkiniń ınspektory oq atylǵanyn estıdi. Reıd qatysýshylary aımaqty aralap, sibir eligin óltirgen úsh er adamdy tapty», dep habarlady SQO PD.
Taǵy bir janýardyń ushasy kúdiktilerdiń Toyota Prado markaly kóliginen tabyldy.
Atalǵan fakt QR QK 337-babynyń 4-bóligi «Zańsyz ańshylyq» boıynsha sotqa deıingi tergeýdiń biryńǵaı tizilimine engizildi.
Qylmys jasady degen kúdikpen 52 jáne 39 jastaǵy eki Petropavldyq, sondaı-aq Mamlıýt aýdanynyń 51 jastaǵy turǵyny ustaldy.
Kúdiktilerdiń birinen 308 kalıbrli Steyr Mannlicher myltyq karabıni tárkilendi.
«Tabıǵatty qorǵaý polısııasynyń qyzmetkerleri únemi ań aýlaý jáne balyq aýlaý erejelerin saqtaý, brakonerlik faktileriniń aldyn alý boıynsha reıdter júrgizedi. Bul is-sharalar múddeli uıymdardyń ókilderimen birlesip ótkiziledi. Jyl basynan beri oblysta zańsyz ań aýlaýdyń 10 faktisi tirkelip, ań aýlaý erejelerin buzýdyń 405 faktisi anyqtaldy», dedi SQO PD JPQ tabıǵatty qorǵaý polısııasy tobynyń erekshe tapsyrmalar jónindegi aǵa ınspektory Ashat Qojabaev.