Ortalyq telekommýnıkasııalar qyzmeti alańynda Soltústik Qazaqstan oblysynyń jaman indettiń taralýyna jol bermeý jónindegi sharalary baıandaldy. Máslıhatqa óńir ákiminiń orynbasary Asqar Saqypkereev, oblystyq sanıtarlyq-epıdemııalyq baqylaý departamentiniń basshysy Áset Jumataev jáne densaýlyq saqtaý basqarmasynyń basshysy Qabdyrahman Saqtaǵanov qatysty.
Asqar Jolamanulynyń aıtýyna qaraǵanda, qazir oblysta jaman indet jaǵdaıy turaqtalyp keledi. Vaksına alýdy jalǵastyrý jáne basqa da aldyn alý sharalarynyń nátıjesinde indettiń taralymy birshama azaıdy. Pandemııa bastalǵannan beri 23 354 adam osy naýqaspen tirkelgen. Sońǵy táýlikte 75 adamnyń boıynan jaman indettiń belgileri tabylǵan. Buǵan deıingi eki aptada bul kórsetkish 140-450-den kem bolmaǵan edi. Demek táýliktik kórsetkish sońǵy aptada eki ese azaıǵan. Jalpy, naýqasqa shaldyǵý qazir 44 paıyzǵa deıin azaıyp, 100 myń adamǵa shaqqanda 195 adamǵa túsip otyr. Oblys 4 qyrkúıekten beri «sary aımaqqa» ótken.
A.Saqypkereev 3 apta buryn bir táýlikte 171 adamnyń boıynan indet tabylyp, antırekordtyq kórsetkish bolǵanyn eske saldy. «Qazir indetke shaldyqqandardyń 92 paıyzy emdelip shyqty. Alaıda indet bastalǵannan beri 181 adam qaıtys boldy», dedi ol.
Barlyq naýqastardyń 65 paıyzynan indet ózderi emhanalarǵa kelgende anyqtalǵan. Al naýqaspen qatynasqa túskenderden anyqtalǵany – 22 paıyz. Sonymen qatar profılaktıkalyq sharalar barysynda barlyq naýqastyń 13%-y anyqtalǵan. Adamdardyń jastaryna qaraǵanda naýqasqa shaldyqqandardyń eń joǵary úlesi 60 jastan asqandarǵa tıesili. Barlyq naýqastyń 31%-y osy jastyń úlesinde.
Búgingi tańda oblystyń barlyq medısınalyq mekemesi shtatty rejimde jumys isteýde. Josparly medısınalyq kómek toqtatylǵan joq. Turǵyndar medısınalyq kómektiń barlyq túrin kedergisiz alýda. Oblystaǵy jaman indetpen naýqastanǵandarǵa 1 715 tósek bólingen. Onyń 31%-y qazir tolyq. Sonymen birge 775 oryn qosymsha bos tur. Jan saqtaý bólimindegi barlyq 115 orynnyń qazir 58%-y tolǵan. Adamǵa shaqqanda 67 adam jansaqtaý bóliminde ottegimen dem alyp jatyr. Olardyń 22-si О́JT (IVL) apparatynyń kúshimen dem alýda.
Búgingi tańda oblys aýrýhanalaryna jetetin medısınalyq preparattardyń eki aılyq qory qordalanǵan. Al bólshek saýdada bir aılyq qor bar jáne ol jańalanyp turady. Sonymen qatar turaqtandyrý qorynda 22 túrli dári-dármek qory saqtaýly.
Halyqty vaksınalaý jumystary da jaqsy jolǵa qoıylǵany aıtyldy. Búgingi tańda oblysta 102 egý kabıneti, 62 jyljymaly vaksınalaý brıgadasy, 8 jyljymaly keshen uıymdastyrylǵan. Búgingi tańda vaksınanyń tolyq kýrsyn 209 myń adam alǵan. Bul vaksına alýǵa nıet bildirgenderdiń 67%-y. Al vaksınanyń birinshi komponentin turǵyndardyń 75 paıyzy aldy. Sonymen birge egýdiń tolyq kýrsyn alǵandardyń arasynan 1 240 adam indetke shaldyqqan. Bul egilgenderdiń 0,6 paıyzy.
«Ashyq» qosymshasymen oblystyń 2 554 nysany qamtyldy. Sol arqyly 300-den asa adamnan «qyzyl», 250 adamnan «sary» mártebe anyqtaldy. Olardyń bárine aıyppul salynyp, 80 adam úı karantınine jabyldy.
Monıtorıngtik toptar da óz jumysyn nátıjeli júrgizýde. Birinshi qyrkúıekten beri 92 reıd jasalyp, 494 nysandy qamtydy. Nátıjesinde, 13 adam jaýapkershilikke tartyldy.
Mektep oqýshylary standartty oqý júıesinde oqyp jatyr. Kanıkýldan keıin mektepke oralǵan oqýshylar arasynan 129 balanyń boıynan indet tabylǵan. Qazir bul oqýshylar jáne olarmen qatynasqan adamdar qashyqtan oqý rejimine aýystyryldy.
Jalpy oblysta densaýlyq saqtaý máselesine bıyl 3 mlrd teńge baǵyttalyp otyr. 480 oryndy kópbeıindi aýrýhananyń qurylysy jalǵasýda. Taǵy bir jańa emhana qurylysy qolǵa alynǵan.
Soltústik Qazaqstan oblysy