Áleýmettik jelide «Qostanaı qalasyndaǵy №7 mekteptiń oqýshylaryna ata-analardyń ruqsatynsyz vaksına egilip, saldarynan 2 oqýshy kóz jumdy. Taǵy úsh bala jansaqtaý bóliminde jatyr» degen jamanat habar tarap ketti. Oblystyq densaýlyq saqtaý basqarmasy jurtty dúrliktirgen bul aqparattyń jalǵan ekenin resmı túrde málimdedi.
Whatsapp jelisindegi habarlamada aýzynan aq ıt kirip, kók ıt shyqqan áldekim: «...Búgin meniń áıelim uıyqtap qalyp, ulymdy mektepke apara almady. Qyzym da oqymaıdy. О́ıtkeni bir bala kovıd juqtyrǵan ba, álde naýqaspen baılanysta bolǵan ba, áıteýir, 7 synypty taratyp jiberipti. Búgin «mantý» synamasyn alamyz dep aldap, balalarǵa ekpe salypty. Iýrkamen birge bir bala oqıtyn. Ol ekpe qabyldap, úıine kelgen soń, ózin nashar sezinip, dene qyzýy 40-qa deıin kóterilgen soń, jansaqtaý bólimine alyp ketipti, balaqaı sol jerde kóz jumǵan. 9 jastaǵy bala, ekpeden óldi. Taǵy úsh bala aýyr halde aýrýhanada jatyr. Osynyń bárin istep otyrǵan Qostanaıdaǵy №7-mektep. 13 balaǵa mantý dep, onyń ornyna vaksına ekken. Ekpeni ata-analardyń ruqsatynsyz ekken, tezirek taratyńdar osyny», dep yshqyna sóıleıdi.
Ekinshi bireý qyp-qyzyl ótirikti qyzdyra túsip: «Qazir ǵana Serega qońyraý shaldy, ekinshi bala da kóz jumypty. Jansaqtaý bóliminde 4 bala jatqan, sonyń ekeýi óldi», deıdi.
Oblystyq densaýlyq saqtaý basqarmasy men bilim basqarmasynyń ókilderi bul aqparatty joqqa shyǵaryp, Qostanaı oblysynda birde-bir mektepte oqýshylarǵa koronavırýstyq ınfeksııaǵa qarsy vaksınalaý júrgizilmegenin málimdedi. Polısııa jeliden jel sóz taratqan belgisiz ekeýdi anyqtaý úshin keshendi jedel-izdestirý is-sharalaryn qolǵa aldy.
– Atalǵan faktige qatysty QK-niń 274-babynda kózdelgen «kórineý jalǵan aqparat taratý» boıynsha sotqa deıingi tergeý bastaldy. Atalǵan bap boıynsha 1 myń aılyq eseptik kórsetkishke deıingi mólsherde aıyppul salý nemese sol mólsherde túzeý jumystaryna, bolmasa 400 saǵatqa deıin qoǵamdyq jumysqa tartý, sondaı-aq bir jylǵa deıin bas bostandyǵyn shekteý jáne bas bostandyǵynan aıyrý jazasy kózdelgen. Jalǵan habar nemese áleýmettik jelide negizsiz aqparat taratatyndar qylmystyq jaýapkershilikke tartylatynyn eskertemiz, – dedi oblystyq PD basshysynyń keńesshisi Elena Kasharına.
Bul jaıdan atalǵan mektepte balalaryn oqytyp jatqan ata-analar da habardar eken. Bilim oshaǵynda eshqandaı ekpe júrgizilmegenin olar da aıtyp otyr.
Qostanaı oblysy