16 qyrkúıekte Qostanaıda jer úıdiń jertólesinde jarylys boldy. Kýágerlerdiń aıtýynsha, onda úsh er adam montajdaý kóbigimen jumys istep jatqan, dep habarlaıdy Egemen.kz.
«Bul úıde úsh er adam montajdaý kóbigimen jumys istep júrgen, qabyrǵany tyǵyzdap jatty. Bólmede gaz jınalyp qaldy. Er adamdardyń biri tutanǵan temekimen jertólege tústi. Saldarynan jarylys boldy. Báriniń denesi qatty kúıdi, aýyr hálde jatyr», dedi oqıǵa kýágerleri.
Zardap shekken úsh adam da Qostanaı qalalyq aýrýhanasyna jetkizilgen.
«1995 jylǵy er adamnyń basyn, keýdesi men aıaq-qolyn úshinshi dárejeli kúıik shaldy, terisiniń 80%-y kúıdi. 1984 jylǵy er adamnyń terisiniń 35%-y kúıdi, basy, keýde tusy men tynys joldaryn úshinshi dárejeli kúıik shaldy. Ekeýi de jansaqtaý bóliminde jatyr», dep naqtylady oblystyq densaýlyq saqtaý basqarmasynyń baspasóz hatshysy Ksenııa Jylqybaeva.
Al 1983 jylǵy úshinshi azamattyń beti men basynyń bir bóligin ekinshi dárejeli kúıik shalǵan, barlyǵy 12%. Ol aýrýhanaǵa jatýdan bas tartty.