Premer-Mınıstrdiń orynbasary – Indýstrııa jáne jańa tehnologııalar mınıstri Áset Isekeshev Astana qalasyndaǵy «Ábý-Dabı Plaza» jobasy boıynsha keńes ótkizdi. Bul joba Memleket basshysy N.Á. Nazarbaevtyń Birikken Arab Ámirlikteriniń basshylarymen kelisimi boıynsha iske asyrylýda.
Premer-Mınıstrdiń orynbasary – Indýstrııa jáne jańa tehnologııalar mınıstri Áset Isekeshev Astana qalasyndaǵy «Ábý-Dabı Plaza» jobasy boıynsha keńes ótkizdi. Bul joba Memleket basshysy N.Á. Nazarbaevtyń Birikken Arab Ámirlikteriniń basshylarymen kelisimi boıynsha iske asyrylýda.
Jobany BAÁ ınvestorlary tolyǵymen qarjylandyrýda. Investısııalardyń jalpy kólemi 1,6 mlrd. AQSh dollaryn quraıdy. Aıta keterligi, ol energııany únemdeý jáne ekologııa salasyndaǵy ozyq tehnologııalar boıynsha salynatyn, Qazaqstandaǵy eń birinshi jáne ózinde «bıznes, turǵyn úı jáne oıyn-saýyq» uǵymdaryn qamtıtyn erekshe kóp fýnksııaly keshen bolmaq.
Keńeste qurylysty 2016 jyldyń sońyna deıin aıaqtaý maqsatynda 2014 jylǵa arnalǵan jumystar jospary talqylandy. «Aldar Propertız» basqarma tóraǵasy Ábý Bákir ál-Hýrıdiń aqparatynsha, 2014 jyly keshen qurylysyna jumystyń eki aýysymdyq tártibinde 7 myńǵa jýyq adam tartylady. Osy ýaqytta qurylys alańynda 1000 tarta adam jumys isteýde.
«Biz «Ábý-Dabı Plaza» qurylysyna jergilikti kompanııalardy tartýymyz qajet», dedi vıse-premer. Osyǵan oraı taraptar jaqyn arada «Ábý-Dabı Plaza» jobasyn júzege asyrýǵa otandyq qurylys kompanııalaryn jáne qurylys materıaldaryn óndirýshilerdi tartý maqsatynda qazaqstandyq merdiger uıymdardyń qatysýymen keńes ótkizýge ýaǵdalasty.
«Memleket basshysy óziniń jýyrdaǵy Joldaýynda Qazaqstandaǵy bıznesti qoldaýǵa taǵy da erekshe nazar aýdardy. Oǵan qosa, otandyq qurylys ındýstrııasyn damytý ÚIID baǵdarlamasynyń bir basymdyǵy bolyp tabylady. Al jergilikti mazmundy arttyrý saıasaty – kásipkerlerimizdi qoldaýdyń tıimdi quraly. Jáne biz Prezıdent tapsyrmalaryn oryndaý úshin barlyq sharalardy qabyldaýǵa tıispiz», dep qorytyndylady keńesti Áset Isekeshev.
«Egemen-aqparat».