Jýyqta Varkey qory «Álem muǵalimi» jahandyq syılyǵyna úmitker úzdik ustazdardyń esimin atady. Dúnıejúzilik baıqaýda úzdik elýliktiń qataryna kirgenderdiń qatarynda Semeıdegi Nazarbaev zııatkerlik mektebiniń muǵalimi de bar.
Qýanarlyǵy, jahandyq syılyq fınalyna shyqqandardyń qataryna Semeı qalasyndaǵy fızıka-matematıka baǵytyndaǵy Nazarbaev zııatkerlik mektebiniń fızıka páni muǵalimi Ashat Jumabekov te engen. Bul – Qazaqstan tarıhyndaǵy alǵashqy oqıǵa. Aldaǵy ýaqytta ol halyqaralyq baıqaýda el namysyn qorǵaıtyn bolady.
Álemniń 121 memleketinen synǵa túsken muǵalimder 8 myńnan astam nomınasııa boıynsha iriktelip, Global Teacher Prize-2021 syılyǵyna birtaban jaqyndady. Otyzda orda buzar A.Jumabekov bul mártebege jetý úshin 2018 jyldan beri tynymsyz eńbek etti. Sol jyly 20 mekteptiń ustazdary arasynda birinshi oryndy jeńip alyp, respýblıkalyq kezeńge ótken. Sóıtip, elimizdiń «Úzdik pedagogi» ataǵyna ıe bolǵan.
– Men «Álem muǵalimi» jahandyq syılyǵyna qatysýdy 2020 jyldyń kúzinde bastaǵanmyn. Baıqaý birneshe kezeńnen turdy. Álemniń ár qıyrynan myńdaǵan ótinish qabyldandy. Osydan-aq sharany uıymdastyrýshylardyń atqarǵan jumystarynyń az bolmaǵanyn kórýimizge bolady. Varkey qoryna meni úzdik 50 muǵalimniń qataryna qosqandary men ustazdarǵa dál osyndaı múmkindik bergenderi úshin alǵysymdy bildiremin. Qoǵamdyq mańyzdy bastamalardy damytý qorynyń negizin qalaýshy Álııa Nursultanqyzy Nazarbaevaǵa, qordyń barlyq qyzmetkerlerine «Qazaqstan muǵalimi» ulttyq syılyǵynyń bastamashysy bolǵandary úshin úlken rızashylyǵymdy bildiremin, – dedi Ashat Jumabekov.
Sondaı-aq jas ustaz ózi qyzmet etetin Nazarbaev zııatkerlik mektebiniń ujymyna da alǵys bildirdi. Aıta keterligi, mektepte shákirtter ǵana bilim alyp qoımaıdy, sonymen birge ustazdardyń da bilimi birge shyńdalary anyq.
A.Jumabekov – «Bolashaq» baǵdarlamasynyń 2016 jylǵy túlegi. 3 kitaptyń, 50-den astam ǵylymı jumys pen maqalanyń avtory. Eńbekteri Qazaqstan, Reseı, Fınlıandııa, Ulybrıtanııa, Ýkraına memleketterindegi jýrnaldarda, jınaqtarda, gazetterde jaryq kórgen. Shákirtteri – «Týımaada», Ońtústik Koreıada ótken respýblıkalyq, halyqaralyq olımpıadalardyń, ǵylymı jobalardyń júldegerleri. Ol dáris bergen túlekterdiń arasynda Nazarbaev Ýnıversıtet, Gonkong polıtehnıkalyq ýnıversıteti, Ábý-Dabıdegi Nıý-Iork ýnıversıteti, AQSh pen Reseı jáne Eýropanyń tanymal oqý oryndarynyń grant ıegerleri bar.
Aıta ketsek, «Álem muǵalimi» jahandyq syılyǵy ustazdardyń qoǵamdaǵy mańyzyn arttyra otyryp, olardyń kúsh-jigerin búkil álem moıyndaýǵa laıyqty ekenin kórsetýge arnalǵan.
SEMEI