QR Ishki ister mınıstriniń resmı ókili Nurdildá Oraz «Jasóspirim» jedel aldyn alý is-sharasynyń qorytyndysyn jarııalady, dep habarlaıdy Egemen.kz.
«13-19 qyrkúıek aralyǵynda elimizde «Jasóspirim» jedel aldyn alý is-sharasy ótkizildi. Onyń maqsaty – jasóspirimder qylmysynyń jolyn kesý, bala quqyǵyn qorǵaý salasyndaǵy quqyq buzýshylyqty anyqtaý, olardyń quqyqtyq saýatyn arttyrý, sonymen qatar olarǵa qatysty qylmystyq ozbyrlyqtyń aldyn alý», dedi resmı ókil IIM baspasóz qyzmeti alańynda ótken brıfıngte.
Onyń aıtýynsha, is-sharaǵa polısııa qyzmetkerlerinen bólek bilim berý, densaýlyq saqtaý, jergilikti atqarýshy organdar, úkimettik emes uıymdar ókilderi jumyldyrylǵan.
«Apta ishinde júrgizilgen operasııa barysynda túngi ýaqytta ata-anasynsyz dalada júrgen 4,6 myń jasóspirim anyqtaldy.
Jasópirim buzaqylyǵynyń 26-dan astam faktisi áshkerelendi. Shamamen 130 jasóspirim alkogol ishkeni jáne mas kúıde júrgeni úshin ustaldy. Beıimdeý ortalyǵyna qadaǵalaýsyz jáne qorǵansyz júrgen 260-tan astam jasóspirim ornalastyryldy», dedi Nurdildá Oraz.