Bul týraly QR IIM Ekstremızmge qarsy is-qımyl departamenti bastyǵynyń orynbasary Darhan Razýev brıfıng barysynda aıtty, dep jazady Egemen.kz.
«Jalǵan «jarylǵysh zat» qoıylatyn nysandar olar kóbinese adamdar kóp jınalatyn oryndar, memlekettik organdar men bilim berý mekemeleri, kólik ınfraqurylymynyń obektileri bolady. Búgingi tańda quqyq qorǵaý organdarynda mundaı qylmystarmen kúresýge barlyq múmkindik bar, zamanaýı tehnıkalyq quraldarmen jabdyqtalǵan», dedi Darhan Razýev.
Onyń aıtýynsha, qońyraý shalǵan adam daýysyn ózgertse de, sım-kartasy men telefonyn aýystyrsa da, ol báribir tabylady.
«Qylmystardyń 90 paıyzdan astamy «izi sýymaı» kezekshi táýlikte ashyldy. Statıstıkaǵa súıensek, sońǵy on jylda osy sanattaǵy qylmys edáýir azaıdy. Atap aıtqanda, 2011 jyly 123 fakti tirkelgen bolsa, byltyr 50 fakti tirkelgen. Bıyl 8 aı ishinde 52 qylmystyq is tirkeldi, onyń 28-i sotqa joldandy. Qazirgi ýaqytta 16 adamǵa qatysty úkim shyǵaryldy», dedi ol.
Darhan Razýevtyń aıtýynsha, Qazaqstanda terrorızm aktisi týraly kórineý jalǵan habarlama úshin bes myń aılyq eseptik kórsetkishke deıin aıyppul tóleý nemese osy kólemde túzeý jumystaryna tartý, sondaı-aq 5 jylǵa deıin bas bostandyǵynan aıyrý nemese shekteý jazasy qoldanylady.
«Osy qylmysty jasaǵany úshin 14 jasqa tolǵan adamdar qylmystyq jaýapqa tartylady, sondyqtan muny mektep oqýshylary bilýi tıis. Sonymen qatar osyndaı habarlamanyń kesirinen keltirilgen barlyq shyǵyn ótelýi tıis. Mundaı áreketti kámeletke tolmaǵan bala jasaǵan bolsa, shyǵyndy ata-anasy óteıdi», dedi ol.