Sońǵy jyldary óńirde jylyjaı salyp, kókónis ósirýge degen umtylys ulǵaıyp keledi. Tıimdi tusy da tarqatyp aıtýǵa laıyq. Máselen, bazar sóreleri jergilikti ónim esebinen tolyqtyrylsa, jergilikti jerde jańa jumys oryndary ashylyp jatyr.
Kásip ıeleri aldymen topyraq quramyn zerttegen. Keregi de osy. Qunarsyz, aıtaqyr jerden tabys tabý áste múmkin emes qoı. Oıǵa alǵandary oryndalsa, odan keıingi sharýa – daıyn ónimdi ótkizý. Bul oraıda bas qatyratyn eshteńe joq. Tutynýshysy mol Nur-Sultan qalasy irgede. Jylyjaı salynǵan Ybyraı Altynsarın aýyly astanadan atshaptyrym jerde.
Oń-solyn aqyl tarazysyna salyp saraptaǵannan keıin 1 gektar jerge qyzanaqtyń eki túri egildi. Jylyjaıdyń ónimi de jaman emes, barlyq tehnologııalyq talap múltiksiz saqtalǵannan keıin qaýlap óse bastady. Qyltıyp jer betine shyǵysymen-aq kóńil ornyqqan. Jylyna 20 myń tonna ónim jınaýǵa tolyq múmkindik bar. О́zderiniń mejelep otyrǵandary da osy. Jylyjaı dırektory Abzal Orazymbekovtiń aıtýyna qaraǵanda, Nur-Sultan qalasyna syrttan tasymaldanatyn, baǵasy ýdaı kókónis kólemin shektep, jergilikti ónimdi molynan usynýǵa bolady.
– Bastaǵan isimizdiń berekesi «Eńbek» memlekettik baǵdarlamasynyń sharapatymen úıirilip tur, – deıdi Aibol eco product kompanııasynyń jetekshisi Abzal Orazymbekov. – Aýyl sharýashylyǵyn qarjylaı qoldaý qorynan 4 mln teńge nesıe aldyq. О́simtaldyǵy dáleldengen, Gollandııa seleksıonerleriniń tııanaqty tájirıbesinen ótkizilgen eki túrli tuqym ektik. Qazir jylyjaıdyń jalpy aýmaǵy 2 myń sharshy metr, onda 6 myń túp ornalastyryldy. Aldaǵy ýaqytta jylyjaı kólemin taǵy da eki gektarǵa ulǵaıtsaq pa dep otyrmyz. Karantınge baılanysty azdaǵan qıyndyq bolǵanymen, azyq-túlik molshylyǵyn jasaý baǵytynda jumys istep jatyrmyz.
Keshenniń qurylysy qańtar aıynda bastalǵan. Jalpy quny 13 mln teńge tóńireginde. Qolbaılaý bolyp otyrǵan jalǵyz jaı – jylyjaıǵa qajetti sý. Mamandardyń aıtýyna qaraǵanda, sý jetkilikti bolmasa, qyzanaq tamyry zaqymdanbaq. Japyraqtary álsirep, oratylyp qalady. Sol sátte japyraq ta fotosıntez prosesin ala almaı, túıinderge baǵyttalar kúsh kemıdi. Aınalyp kelgende, bar eńbek zaıa bolmasa da, zııan kóbeımek.
Ázirge sýdy tasymaldap, kókónisterin sýaryp otyr. Aýdan ákimdigi qaýyrt naýqan – egin oraǵy aıaqtalǵan soń qolushyn berýge ýáde etti. Tirshilik nári tikeleı tartylsa, jylyjaı aýqymy da keńeıtilip, jańa jumys oryndary ashylmaq. Sol kezde jergilikti ónim kólemin kóbeıtýge múmkindik týady.
Aqmola oblysy,
Selınograd aýdany