Jýyrda Soltústik Qazaqstan oblystyq onomastıkalyq komıssııasynyń otyrysy bolyp, onda ultyn qoldap, qorǵap, qara bastaryna kelgen qaýip-qaterge qaramaı kúresken Alash ardaqtylarynyń aty ulyqtaldy. Komıssııa tóraǵasy, oblys ákiminiń orynbasary Ǵanı Nyǵymetov elimizde sanaq júrgizilip, nysandarǵa at berý nemese aýystyrý máseleleriniń keıinge qaldyrylǵany týraly sheshimniń tyıym salynbaǵan tustary tabylǵanyn aıtty.
«Sanaq júrýine baılanysty at berýge tyıym salý kósheler men eldi mekenderge qatysty. Al bilim berý mekemeleri men basqa oryndarǵa onyń qatysy joq. Sondyqtan biz bastaǵan isimizdi odan ári jalǵastyryp, oblys ortalyǵynda eshkimniń aty berilmegen bilim ordalaryna Alash qaıratkerleriniń esimin berý kerek dep sheshtik. Barlyq mindetti sharalar ótkizildi. Mektep ujymdarymen kezdesýler bolyp, olardyń kelisimderi alyndy», dedi ol óziniń sózinde.
Sonymen qalanyń bertin jańǵyrtylǵan «Bereke» shaǵyn aýdanyndaǵy úsh qabatty №25 mektepke Alash kósemi Álıhan Bókeıhannyń esimi beriletin boldy. Mundaǵy muǵalimder ujymy da usynysty qýanyshpen qabyldap, óz taraptarynan da ún qosyp, qazir túrli sharalar daıyndap jatqan kórinedi.
Al qaladaǵy №9 baıyrǵy mektepterdiń birine ult ustazy Ahmet Baıtursynulynyń aty beriletin boldy. Bul mektep te úsh qabatty, oqýshylar sany 1360, muǵalimder ujymy 95 adamnan turady. Oryssha bilim beretindikten bolsa kerek, mundaǵy keıbir ujym músheleri Ahmet Baıtursynovty bilmeımiz degen sózder aıtqan eken. Tıisti túsindirý sharalary júrgizilip, Ahańnyń eńbekteri týraly aıtylǵannan keıin «bilmeımiz» degenderdiń ózi qoldaıtyndyqtaryn aıtqan.
Al halqymyzdyń ǵajap uldarynyń biri, qazaq atyn álemge alǵash tanytýshy, klassıkalyq kúresten dúnıe júziniń chempıony bolǵan kúsh atasy Qajymuqannyń esimi Ulttyq sport túrleri boıynsha balalar men jasóspirimderge arnalǵan sport mektebine beriletin boldy. Qazir bul mektepte sporttyń 7 túri boıynsha 700 bala jattyǵady. Endi bul balalar ózderiniń Qajymuqan atymen baılanystylyǵyn maqtanyshpen aıtyp júretin boldy. Qaı jerde, álemniń qaı túkpirinde tabysqa jetse de olardyń «men Qajymuqan mektebiniń túlegimin» dep kúsh atasyn aldymen aýyzǵa alary sózsiz.
Al halqymyzdyń arda azamattarynyń biri, stalındik Goloshekınniń ózine qarsy turǵan jasyn tulǵa Smaǵul Sádýaqasovtyń esimi qalanyń eń basty kósheleriniń biri – Internasıonaldaǵy №2 mektepke beriletin boldy. Onyń ujymy da Smaǵuldy tanymaımyz degen eken, tıisti túsinik berý jumystary júrgizilgennen keıin bári de rızashylyǵyn bildiripti. Endi osy mekteptiń aldyna Smaǵuldyń eskertkishi de ornatylmaq. Sonymen qatar osy kósheniń ózin de S.Sádýaqasovtyń atyna berý týraly jospar bar. Sonda, kezinde Stalın atyn alǵan kóshe endi Smaǵuldyń atymen atalatyn bolady. Osynyń ózi halqymyzdyń rýhyn kóterip, eńsemizdi tikteı túsýimizge áser eteri sózsiz.
Sonymen qatar Alash qozǵalysy belsendileriniń biri, biz jýyrda ǵana «Egemenge» kitaby shyqqany týraly jazǵan alǵashqy qazaq dárigerleriniń qatarynda bolǵan Jumaǵalı Tileýlınniń esimin osyndaǵy medısınalyq kolledjge berý týraly usynys ta qaralatyn boldy. Ol úshin osy ujymnyń múshelerimen kezdesip, Jumaǵalıdyń kim ekenin tanystyratyn top quryldy.
Aıtylǵan usynystardyń bárin onomastıkalyq komıssııa músheleri biraýyzdan qoldady. Endi bul sheshim Úkimetke jiberiledi. Ondaǵylar da qoldap, ulttyq qana emes, memlekettik múdde úshin jasalyp jatqan ulaǵatty isterge qolbaılaý jasamasa boldy. Áıtpese... jergilikti jerde bári qoldap, joǵaryǵa jiberilgen Tımırıazev aýdanyn zańǵar jazýshy Sábıt Muqanovtyń atyna berý týraly sheshimdi kóleńkesinen qoryqqan qaısybir sheneýnikter ótkizbeı tastady. «Qazaqtyń keń dalasy atanǵan» Sábıt Muqanov sııaqty tulǵalar bolmasa keńestik shovınıstik saıasattyń kesirinen qazaq atynyń ózi jutylyp kete jazdaǵanyn qazirgi batyrsynyp júrgen bireýler bilmeıdi ǵoı. Sondaılardyń synynan qoryqqan sheneýnikter qazaqtyń birneshe urpaǵyna rýhanı nár berip kele jatqan jazýshynyń esimine aýdan atyn qımady. Olarǵa Sábeńnen góri Tımırıazev aty mańyzdyraq bolypty...
Al myna jańa sheshimderdi ótkizýge eshkim qarsy bolmas degen úmittemiz.
Soltústik Qazaqstan oblysy