IýNESKO qazaqstandyq «Kólsaı kólderi» memlekettik ulttyq tabıǵı parkin óziniń dúnıejúzilik bıosferalyq rezervattar jelisine qosty. Mundaı sheshim IýNESKO baǵdarlamasynyń «Adam jáne bıosfera» halyqaralyq úılestirý keńesiniń 33-sessııasynda qabyldandy.
Qazaqstandyq «Kólsaı kólderi» ótiniminiń eldegi jáne álemdegi kúrdeli epıdemııalyq shekteýler jaǵdaıynda daıyndalǵandyǵy erekshe nazar aýdarýǵa turarlyq. «Kólsaı kólderi» memlekettik ulttyq tabıǵı parki ákimshiligi qyzmetkerleriniń úılesimdi jumysynyń nátıjesinde Qazaqstandaǵy IýNESKO-nyń «Adam jáne bıosfera» baǵdarlamasynyń bıosferalyq rezervattarynyń Ulttyq jelisi taǵy bir bıosferalyq rezervatpen tolyqtyryldy.
Osylaısha, búgingi tańda IýNESKO ulttyq jelisiniń Qazaqstandaǵy bıosferalyq rezervat sany – 13. Bul san Ortalyq Azııanyń basqa elderdegi bıosferalyq rezervattar sanynan edáýir asyp túsedi. Bıosferalyq rezervattar kóleminiń osylaı tanylýy Qazaqstannyń bıologııalyq ártúrliligin saqtaý máselelerine álemdik qoǵamdastyqtyń nazaryn aýdarǵanyn jáne ony bolashaq urpaq úshin saqtaýǵa umtylatynyn aıǵaqtaıdy, dep habarlady Ekologııa, geologııa jáne tabıǵı resýrstar mınıstrliginiń baspasóz qyzmeti.