Astyq óndirýshi elderde bıdaı óndirisi tómendeýi múmkin. Bul týraly Úkimet otyrysynda Aýyl sharýashylyǵy mınıstri Erbol Qarashókeev aıtty, dep jazady Egemen.kz.
«AQSh Aýyl sharýashylyǵy mınıstrligi men Astyq jónindegi halyqaralyq keńestiń esebine sáıkes, barlyq negizgi astyq óndirýshi elderde bıdaı óndirisiniń tómendeýi kútilýde. Máselen, Kanadada bıdaı jınaý ótken jylmen salystyrǵanda - 34,5%, Reseıde - 15%, Amerıkada - 7% tómendeýi múmkin. Astyq jónindegi halyqaralyq keńestiń baǵalaýynsha, álemde bıdaı óndirý kólemi 781,7 mln tonnany quraıdy», dedi mınıstr.
Mınıstrdiń málimdeýinshe, bıyl dándi jáne maıly daqyldardy jınaý alańy 18,9 mln gektardy qurady. Oblys ákimdikteriniń deregi boıynsha, ónimdilik gektaryna 9,5 sentner bolǵanda (s/ga) dándi jáne maıly daqyldardyń boljamdy jalpy túsimi shamamen 18 mln tonnany quraıdy.
«Búgingi kúni shamamen 14,3 mln tonna dándi-daqyldar jáne 200 mln tonna maıly daqyl jınaldy. Al barlyq maıly daqyldy jappaı jınaý osy aıda bastalady», dedi mınıstr.