Qostanaı oblystyq máslıhatynyń kezekten tys otyrysynda densaýlyq saqtaý salasyn jas mamandarmen tolyqtyrý máselesi qaraldy. Aımaqta medısına qyzmetkerleri jetispeıdi. Oblystyq máslıhat depýtattary bul máseleniń ońtaıly sheshilýi úshin bıyl óńirge keletin jas mamandarǵa beriletin kótermeaqy mólsherin kóbeıtý týraly sheshim qabyldady.
Búginde Qostanaı oblysynda 14 857 medısına qyzmetkeri eńbek etýde. Alaıda 308 dárigerdiń orny bos tur, onyń 97-si aýyldyq mekenderde. Oblystyq densaýlyq saqtaý basqarmasy basshysynyń mindetin atqarýshy Rústem Aıtbaevtyń aıtýynsha, aımaqta, ásirese, sońǵy jyldary osy olqylyqtyń ornyn toltyrý maqsatynda pármendi jumys júrip jatyr.
– О́zge óńirlerden tájirıbesi mol, bilikti dárigerler tartylýda. Jas mamandardyń qatary da jyl saıyn túlektermen tolyqtyrylyp otyr. Munyń syrtynda, 2018 jyldan beri elimizdiń medısınalyq ýnıversıtetterinde 100 stýdent oqyp jatyr. Olar shákirtaqyny oblys bıýdjetinen alady, esesine ár stýdentpen oqýyn támamdaǵan soń, osy óńirde 5 jyl jumys isteý týraly kelisimshart jasalǵan. Búgingideı kúrdeli jaǵdaıdaǵy kadr tapshylyǵyn eskere otyryp, biz aldaǵy ýaqytta óńirge keletin mamandarǵa beriletin kótermeaqy kólemin qalalyq jerge keletin dárigerlerge 1,5 mln teńgege, aýylǵa baratyn mamandarǵa 2 mln teńgege deıin kóbeıtýdi suraımyz, – dedi R.Aıtbaev.
Oblystyq máslıhat depýtattary basqarma basshysynyń ótinishin biraýyzdan qoldady. Buǵan deıin dárigerler qalalyq mekenge kelse – 1 mln teńge, aýylǵa barsa 2 mln teńge kótermeaqy alyp kelgen.
Qostanaı oblysy