Ejelden án-jyrdyń altyn besigi atanǵan Kókshetaýda qalalyq ákimdiktiń qoldaýymen «Til mártebesi – el mártebesi» taqyrybyndaǵy jyr saıysy ótti.
Sóz saıysyna onnan astam talapker qatysyp, el birligi, táýelsizdik jyldaryndaǵy jetistik jaıyn balaýsa jyrlaryna arqaý etti. Kópten beri Kókshetaýda kóbeń tartqan aıtys ónerin damytýǵa múmkindik mol ekendigin jas talaptardyń sóz saptaýynan aıqyn ańǵarýǵa bolady. Arakidik jastyqtyń jalynymen basasaý sóz kezdesip qalǵanymen, tutastaı alǵanda kóptiń kókeıinde júrgen tolymdy máselelerdi kótergen el sózi de aıtyldy. Kóz kórgenmen kóńil aýdarmaǵan rýhanı álemniń keıbir jutań tustary da umyt qalǵan joq. Bir aýyz sózben jesir daýyn, jer daýyn sheship, el irgesin bekitip, uıytqy bola bilgen babalardan qalǵan jyr baıraǵy júrek jylytar shýaqpen shalqyp turǵan kún boldy bul! Qasıetti sahnaǵa tuńǵysh shyǵyp turǵanymen, bolashaǵynan úmit kúttiretin jas talaptar da joq emes eken.
– Táýelsizdik toıyna arnalǵan aımaqtyq aıtysqa osy joly salmaqty sózimen kóringen eki talapker joldama alady, – deıdi Kóken Shákeev atyndaǵy aqyndar mektebiniń jetekshisi Muhamed Qońqaev, – ulttyq bolmysty ulyqtaıtyn uly ónerdiń arnasyn osylaısha keńeıtemiz. Kóksheniń kóleminde qalmaı uzap shyǵyp, úlken aıtystarǵa qatystyryp shyńdasaq, sóz ustaıtyn jastar barshylyq.
Oramdy sóz ben oryndy oı aıtylǵan aıtysty tyńdap otyryp, óleń qonyp, án ushqan ólkeniń keleshegi kemeldene beretinine bek sendik. Sóz túzelip keledi eken, ózgesi de túzeler.
Kókshetaý