Taldyqorǵanda 23 jastaǵy erkin kúres sheberleri arasynda qazaqtyń dańqty balýany Ábilseıit Aıhanovty eske túsirýge arnalǵan respýblıkalyq týrnır aıaqtaldy, dep habarlaıdy Egemen.kz.
Aıtýly jarysta Nur-Sultannan kelgen balýandardyń mereıi ústem boldy. Olar úsh salmaq dárejesi boıynsha ótken saıystarda top jaryp, ózderiniń babynda ekenderin baıqatty. Atap aıtsaq, Ilııas Amanjolov (65 kılo), Sanjar Dosjanov (70 kılo) jáne Bekzat Úrkimbaı (92 kılo) syndy saıypqyrandarǵa teń keler eshkim tabylmady. О́zge salmaqtarda tarazdyq Rahat Qaljan (57 kılo) men Iýnýs Gafýrov (97 kılo), shymkenttik Asyl Aıtaqyn (61 kılo) men Maqsat Satybaldy (86 kılo), aqtóbelik Ákejan Ábdihamıt (74 kılo) pen Beıbarys Nurylla (79 kılo) bas júldeni oljaldy. Alyptardyń aıqasy Baqdáýlet О́serbaıdyń jeńisimen aıaqtaldy. Túrkistannan kelgen nar tulǵaly jigit fınalda Mańǵystaý oblysynyń ókili Álibek Sársenǵalıevke san soqtyrdy.
Qazaqstan qurama komandasy bapkerleriniń aıtýynsha, osy jarysta jeńimpaz atanǵan balýandar ústimizdegi jyly ótýge tıis álem birinshiligine (U-23) qatysady.