Bata alý

Almatyda «Astana Opera»  teatrynyń tuńǵysh gastróli bastaldy

Almatynyń mádenı ómirindegi aıtýly oqıǵanyń biri – «Astana Opera» teatrynyń alǵashqy gastróli bolyp tur. Elordadaǵy eń eńseli óner ordasynyń syrtqa sapary otandyq mádenıettiń Mekkesindeı bolǵan Almatydan bastalýy da kezdeısoqtyq emes. Astanalyq Opera teatry shet memleketterde ultymyzdyń atyn shyǵaryp, saltanat qurmas buryn, osydan 80 jyl buryn Almatyda ulttyq opera jáne balet óneriniń ýyǵyn qadap, keregesin kergen qazaqtyń bir kezdegi aıtýly ul-qyzdarynyń arýaǵyna bas ıip, batasyn alýdy jón sanapty.   Myna ǵajap sáıkestikti qarańyz, bir kún artyq-kemi joq, týra segiz aı buryn  «Astana Opera» teatryn qurý týraly qujatqa qol qoıylǵan. Al aldaǵy kúnderi Almatydaǵy Abaı atyndaǵy Memlekettik akade­mııalyq opera jáne balet teatry 80 jyldyǵyn atap ótkeli otyr. Sondyqtan da Almatyda jeti kún  boıy sahnada saltanat quratyn «Astana Opera» teatrynyń alǵashqy baspasóz máslıhatyn da tarıhı sátke jatqyzýǵa ábden bolady. Alǵashqy gastról, alǵashqy kezdesýler... Elordadan tys jerdegi tuńǵysh kórermender men suhbattar. Sonymen, álemdegi eń jas opera teatrynyń dırektory Tólegen Muhamedjanov ońtústik astanada ótken baspasóz máslıhatynda gastróldik sapardyń jaı-japsary týraly jan-jaqty áńgimeledi. Sırek bolatyn mundaı baspasóz máslıhatyn BAQ ókilderi de sátti paıdalanyp, áriptesterimiz opera qoıylymdary, balet ónerine qatysty saýaldardyń tıegin aǵytty. Al Almatydaǵy baıyrǵy opera teatry – qarashańyraq óner ordasy da jol biletindigin tanytyp, elordadan kelgen óner ujymyna ulttyq bekzat ónerdiń aıtýly tulǵalarynyń tarıhı portretterin tartý etti. Bizdiń ásershil kóńilimizde qaıta týmas bul beıneler alystan qol bulǵap, árqaısysy urpaqtyń ónerdegi endigi uly bastamalaryna qoldaý kórsetip, bata berip turǵandaı kóringeni ras. Osydan keıin «Astana Opera» teatry men Abaı atyndaǵy Memlekettik akademııalyq opera jáne balet teatry Máńgilik áriptestik pen yntymaqtastyq týraly memorandýmǵa qol qoıdy. Árıne, baspasóz máslıhatynda «Astana Opera»  teatrynyń Almatyǵa alyp kelgen qoıylymdary týraly da sóz boldy. – Biz úshin bul sapar synaqpen teń, sebebi, aldynda Qazaqstanmen qatar shetelde ótetin úlken gastrólder turǵan «Astana Opera» teatry úshin bul úlken qadam, – dedi Tólegen Muhamedjanov. Gastróldik baǵdarlamanyń birin­shi kúni, ıaǵnı búgin Reseıdiń halyq ártisi Iýrıı Aleksandrovıchtiń qoıy­lymyndaǵy  qazaq operasynyń marjany – «Birjan-Sara» usyny­lady. Al 5 aqpanda kórnekti kompozıtor Sergeı Prokofevtiń «Petıa men qasqyr» sımfonııalyq ertegisi jas kó­rermenderin qýantsa, osy kú­ni keshke «Astana Operanyń» sım­fonııalyq orkestri konsert beredi. 6 aqpanda kópshilik nazaryna ǵalamat-konsert usynylmaq. Hor ónerin súıetin halaıyq 7 aqpanda Qazaqstan Respýblıkasyna eńbek sińirgen qaıratker Erjan Dáýitov jetekshilik etetin «Astana Opera» kameralyq ho­rynyń konsertin tamashalaı alady. Sol sııaqty, teatrdyń balettik trýppasy álemdik horeografııanyń has úlgisi – «Romeo men Djýlet­ta­ny» Sharl Jıýdtiń qoıylymynda sahnaǵa alyp shyǵady. Álemdegi eń jas balet trýppasynyń qary­myn tamashalaýǵa asyqqandar bul múmkindikti jibermeýi tıis. «As­tana Opera» teatry gastróliniń afı­sha­­syn­daǵy spektaklder tizimin 10 aq­panda Reseıdiń halyq ártisi Bo­rıs Eıfmannyń qoıylymyndaǵy «Ro­den» baleti túıindeıdi. Aınash ESALI, «Egemen Qazaqstan». ALMATY.