«Bastaý Bızneske» – bes jyl

Qazaqstannyń Tuńǵysh Prezıdenti – Elbasy Nursultan Nazarbaev forým qatysýshylaryna beıneúndeý joldap, jobany odan ári jalǵastyrý qajettigin atap ótti. Elbasy «Bastaý Bıznes» baǵdarlamasyna joǵary baǵa berdi.

«Oqý aıaqtalǵannan keıin bıznes-trenerler jyl boıy kásipkerlerdiń jobalaryna jetekshilik etedi. Isin jańa basta­ǵan kásip­kerdiń problemasyn sheshýge kómektesedi. Bul, ásirese, bızneske jahandyq pandemııaǵa baılanysty qatty qysym túsken kezde óte qajet. Elimizdiń gúldenýi azamattardyń ál-aýqatyna tikeleı baılanysty. Sondyqtan men joǵary baǵalaıtyn «Bastaý Bıznes» baǵdarlamasynyń barlyq qatysýshysyna sáttilik tileımin. El boıynsha bul baǵdarlamany jalǵastyrý kerek», dedi Nursultan Nazarbaev.

Elbasy joba kásipkerlik negizderine úıretý arqyly ǵana emes, sonymen qatar «Eńbek» baǵdarlamasy aıasynda jeńildetilgen mıkrokredıt nemese grant usynýymen tanymal bolǵanyn jetkizdi. 2021 jyldan bastap «Atameken» aýyl azamattaryn kásipkerlik negizderine oqytyp qana qoımaı, bıznes-jobalardy qarjylandyrady ári súıemeldeıdi. Ol úshin el boıynsha 15 mıkroqarjy uıymy quryldy. Jeńildikpen kredıt berý úshin memleket 22,5 mlrd teńge bóldi.

«Atamekenniń» tóralqa tóraǵasy Tımýr Qulybaev qazir ótinimderdi qaraý jáne qarajat berý boıynsha jumys qarqyndy júrip jatqanyn atap ótti.

– «Atameken» mıkroqarjy uıymdary­na 2 myńǵa jýyq ótinim tústi. Berilgen mıkrokredıt nátıjesi boıynsha 5 myńnan asa kásiporyn men keminde 10 myń jumys ornynyń ashylýy, sondaı-aq bıýdjetke tólenetin salyq tóleminiń ulǵaıýy kútilýde. Bes jyl ishinde «Bastaý Bıznes» naǵyz halyqtyq jobaǵa aınaldy. Ásirese aýyldyq jerlerde júzdegen myń qazaqstandyqtyń ómirin ózgertýge múmkindik berdi dep senimmen aıta alamyz. Eldi mekenderde jobaǵa degen suranys joǵary, – dedi T.Qulybaev.

Bıyl «Bastaý Bıznes» jobasy bo­ıynsha 30 myń qazaqstandyq bilim alǵan. Olardyń qatarynda elordalyq Tatıana Kýsnýtdınova da bar. Ol ońaltý ortalyǵyn ashqan. Tatıananyń balasyna dárigerler aýtızm dıagnozyn qoıǵan eken. 15 jyldyq tájirıbesi bar pedagog birneshe jyl buryn balasyn ońaltý úshin Aqmola oblysynan kóship kelipti. Keıin logoped-defektolog retinde bilim alǵan Tatıana ulyn aıaǵyna turǵyzyp, ózi sekildi analarǵa kómektesýge kirisken.

– Balamnyń dıagnozyn jeńip shyqqan­da, jeke ońaltý ortalyǵyn ashý qajettigin túsindim. Jabdyq alýǵa qarajat bolmaǵan soń, memlekettiń qoldaýyna arqa súıedim. 2021 jylǵy maýsymda «Bastaý Bıznes» jobasyna qatystym. Eki aı buryn 5 mln teńge grant alyp, «BAK» jáne «INtaım» atty eki apparattyq ádistemeni satyp aldym. Endi men ulym sııaqty balalarǵa kómektese alamyn. Sondaı-aq jumys oryndaryn ashamyn. Qazir alty adamdy jumyspen qamtyp otyrmyn. Taǵy úsh adamdy jumysqa qabyldaımyn, – deıdi T.Kýsnýtdınova.

«Bastaý Bıznes» aıasynda bes jylda 185 myńǵa jýyq adam kásipkerlik negizderin meńgergen. Olar 53 myń bıznes-jobany iske asyrdy. Jobanyń árbir úshinshi túlegi jeke kásibin bastaǵan. Joba túlekteri osy kúnge deıin 70 myńǵa jýyq jumys ornyn ashyp, 1,5 mlrd teńge salyq tólegen. «Bastaý Bıznes» Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy aıasynda júzege asyrylyp jatyr.

Jalpy, «Bastaý Bıznes» jobasynyń tarıhy 2016 jyldan bastaldy. Qanatqaqty joba aldymen Mańǵystaý oblysynyń Munaıly aýdanynda, Jańaózende jáne Aqtóbe oblysynyń Temir aýdanynda iske qosyldy. Týra bir jyldan keıin «Eńbek» memlekettik baǵdarlamasynyń ekinshi baǵytyn oqytý formaty retinde qabyldandy. 2017 jyly 80 aýdannyń aýyldaryndaǵy 15 myń turǵyn oqyp, árbir besinshi azamat (3 314 nemese 22 paıyzy) óz jobasyn iske qosty. Jyl saıyn jobanyń aýqymy men áleýmettik mańyzy keńeıe tústi. 2018 jyly qalalar men monoqalalardyń jumyssyz jáne ózin ózi jumyspen qamtyǵan turǵyndary oqýǵa tartylyp, 160 aýdan qamtyldy. 2019 jyldan bastap jobaǵa Nur-Sultan, Almaty jáne Shymkent qalalary qatysyp keledi. 2019 jyldan beri NEET sanatyndaǵy jumyssyz jastarǵa, jas otbasy múshelerine, kópbalaly, az qamtylǵan otbasylarǵa jáne eńbekke qabiletti múgedekterge erekshe nazar aýdarylýda.