Qazaqstan keler jyly Azııadaǵy ózara yqpaldastyq jáne senim sharalary jónindegi keńeske tóraǵalyq etip, Keńestiń 30 jyldyǵyna arnalǵan sammıt ótkizedi. Bul týraly Qazaqstan Prezıdenti Qasym-Jomart Toqaev BUU Bas Assambleıasy 76-sessııasynyń Jalpy debattarynda aıtty, dep jazady Egemen.kz.
Prezıdent órkenıetterdiń eýrazııalyq toǵysynda ornalasqan Qazaqstan burynǵydaı tepe-teń, syndarly syrtqy saıasat ustanatynyn málimdedi.
«Bizdiń jaqyn kórshilerimizdiń bárimen, batys elderimen, Eýropalyq odaqpen, Azııa jáne Taıaý Shyǵystaǵy memlekettermen qarym-qatynasymyz óte jaqsy. Azııadaǵy ózara yqpaldastyq jáne senim sharalary jónindegi keńestiń basty maqsaty da osy. Qazaqstan keler jyly AО́SShK-qa tóraǵalyq etip, Keńestiń 30 jyldyǵyna arnalǵan sammıt ótkizedi. Bizdiń álem ózara baılanysty ári názik. Biz adamdarǵa naqty nátıje beretin jáne shynaıy jahandyq yntymaqtastyqqa arqaý bolatyn syndarly dıalog qurýǵa muqtajbyz», dedi Memleket basshysy.
Q.Toqaev halyqaralyq uıymdar, qarjy mekemeleri, azamattyq qoǵam, bıznes, jergilikti jáne aımaqtyq bılikti adamzatqa ortaq ıgilik jolynda belsendi ári shynaıy bolýǵa shaqyrdy.
«Bizdiń ortaq bolashaǵymyzdy ózimizden basqa eshkim qamtamasyz etpeıdi. Eshqandaı ult jalǵyz júrip jol tappaıdy jáne órkendemeıdi. Onyń emi de, daýasy da joq. Dál qazirgi ýaqyt álemdi jaqsylyqqa jeteleýdiń ujymdyq múmkindigin usynyp otyr», dedi Prezıdent.