Elordada TMD-ǵa múshe memleketter Bas prokýrorlarynyń úılestirý keńesiniń jıyny ótip jatyr. Osymen 31-ret uıymdastyrylyp otyrǵan is-sharanyń ashylý saltanatyna Memlekettik hatshy Qyrymbek Kósherbaev, Qazaqstan, Reseı, Ázerbaıjan, Armenııa, Belarýs, Qyrǵyzstan, Moldova, Tájikstan jáne О́zbekstan memleketteriniń Bas prokýrorlary qatysty.
Memlekettik hatshy Qazaqstan Prezıdenti Qasym-Jomart Toqaevtyń quttyqtaý sózin oqyp berip, jıyn jumysyna tabys tiledi.
«Sizderdi Qazaqstanda qarsy alyp jatqanymyzǵa shyn júrekten qýanyshtymyn. TMD elderi Bas prokýrorlarynyń úılestirý keńesi – adam quqyqtaryn qorǵaý salasyndaǵy úzdik álemdik praktıkalardy zerdelep, talqylaıtyn mańyzdy alań. О́zara is-qımyldyń mundaı formaty – quqyqtyq saladaǵy tıimdi halyqaralyq yntymaqtastyqtyń úlgisi. TMD keńistiginde zańdylyq pen quqyqtyq tártipti qamtamasyz etý úshin kúsh-jiger barǵan saıyn suranysqa ıe bolyp keledi. Osy jaǵdaıda úılestirý keńesi áriptestikti keńeıtýge jáne óńirdegi turaqtylyqty nyǵaıtýǵa qomaqty úles qosady. Prokýratýranyń qyzmeti búkil quqyq qorǵaý júıesiniń tıimdiliginde, quqyq ústemdigin qamtamasyz etýde jáne zań aldyndaǵy teńdikte basty ról atqarady. Qazaqstan TMD elderiniń qadaǵalaýshy organdarynyń kópjyldyq yntymaqtastyǵyn joǵary baǵalaıdy. Búgin osy saladaǵy ózekti saýaldar jemisti talqylanyp, birlesken jumystyń jańa basymdyqtary belgilenetinine senimdimin. Otyrysqa qatysýshylarǵa tabys jáne alǵa qoıylǵan barlyq mindetti júzege asyrýdy tileımin», delingen Prezıdenttiń quttyqtaýynda.
Reseı Federasııasynyń Bas prokýrory Igor Krasnov otyrysty asha otyryp, Qazaqstannyń Bas prokýrory Ǵızat Nurdáýletovke búgingi is-sharany uıymdastyryp, qazaq jerinde jyly shyraımen qarsy alǵany úshin jáne keńestiń barlyq múshesiniń jeke kezdesýine múmkindik bergenine erekshe rızashylyǵyn bildirdi.
«Pandemııanyń shıelenisken jaǵdaıynda kópten kútken bul kezdesý Qazaqstan Respýblıkasynyń Bas prokýratýrasy men úılestirý keńesi hatshylyǵynyń ujymdarynyń úılesimdi jumysynyń nátıjesinde múmkin bolyp otyr. Bul bizdiń yntymaqtastyqty odan ári damytýǵa jáne ózekti máselelerdi birlesip sheshýge baǵyt alǵanymyzdyń kórinisi», dedi Reseı Bas prokýrory.
Al Qazaqstan Respýblıkasynyń Bas prokýrory Ǵızat Nurdáýletov is-sharaǵa qatysýshylardy quttyqtap, tabysty jumys tileı otyra, osy baǵyttaǵy birlesken jumystyń mańyzdylyǵyna toqtaldy.
«Elderimizdegi koronavırýs jaǵdaıynyń turaqtanýy is-sharany dástúrli formatta ótkizýge múmkindik berip otyr. Men barshańyzdy esen-saý kórgenime qýanyshtymyn. Otyrysqa Táýelsiz Memleketter Dostastyǵyna qatysýshy memleketterdiń Bas prokýratýralarynyń delegasııalary qatysýda.
Qazaqstan Respýblıkasy Prezıdentiniń tapsyrmasy boıynsha quqyq qorǵaý blogy men sot júıesin reformalaýǵa baǵyttalǵan úlken jumys júrip jatyr. Prokýratýra organdarynyń qyzmetin qaıta júktep jatyrmyz dese de bolady. Mundaǵy maqsattardyń biri – salalardyń bárinde, eń birinshi qylmystyq prosesterde azamattardyń quqyqtyq kepildigin kúsheıtý. Búgin biz tájirıbe almasyp, osy jumystyń nátıjeleri týraly aıtyp beremiz», dedi Ǵızat Nurdáýletov.
Osy jıyn úshin elordaǵa arnaıy kelgen Halyqaralyq prokýrorlar qaýymdastyǵynyń Prezıdenti Chhol-Kıý Hvan TMD prokýrorlaryna birlesken keńes ótkizýdi usyndy.
«TMD-ǵa múshe memleketterdiń Bas prokýrorlarymen Qazaqstan astanasynda kezdesip otyrǵanyma óte qýanyshtymyn. Halyqaralyq prokýrorlar qaýymdastyǵynyń atynan TMD-ǵa múshe memleketter Bas prokýrorlarynyń úılestirý keńesiniń 31-otyrysymen quttyqtaımyn. HPQ Prezıdenti retinde men úshin mundaı bedeldi májiliske qatysý – úlken qurmet.
Halyqaralyq prokýrorlar qaýymdastyǵy osy úılestirý keńesiniń májilisterine 2017 jyldan beri qatysyp keledi. HPQ sizdermen jaqyn áriptes bolyp úlgerdi degen oıdamyn. Halyqaralyq prokýrorlar qaýymdastyǵynyń Shyǵys Eýropa men Ortalyq Azııadaǵy ókildigi kelesi aıda Sankt-Peterbýrgte resmı túrde jumysyn bastaıdy. Sondyqtan HPQ TMD Bas prokýrorlarynyń úılestirý keńesimen meılinshe tyǵyz baılanysta jumys isteıdi dep kútemiz. Eger eki uıym birlesken óńirlik konferensııa ótkizse, keleshektegi tyǵyz áriptestikti yntalandyrýǵa jol ashylar edi. Men uıymdardyń birge jumys isteýin jalǵastyratynyna senimdimin. Osy arqyly transulttyq qylmysqa birlesip jaýap bere alamyz dep oılaımyn. Osylaısha, ózara tıimdi nátıjelerge qol jetkizýge bolady», dedi Chhol-Kıý Hvan.
Sonymen birge ol Halyqaralyq prokýrorlar qaýymdastyǵy halyqaralyq prokýrorlyq qyzmettiń jumysyn ilgeriletetin úlken platforma quryp jatqanyn habarlady. Chhol-Kıý Hvannyń aıtýynsha, bul platforma prokýrorlarǵa naqty kezeńde ózara áriptestik ornatýǵa múmkindik bermek.
Otyrys sońynda TMD elderi Bas prokýrorlarynyń úılestirý keńesi birqatar qorytyndy sheshim qabyldady.