Dendegen derttiń beti qaıtar emes

«Jaman tumaýdyń» jan túr­shik­tirer, janyńdy muzdaı qarı­tyn jamanat habary jalpaq álemniń júregin áli de syzdatyp tur. Adamdardyń saqtyq sharalaryn saqtaı bermeýine, der kezinde ekpe ektirmeýine baılanysty óńirdegi jaǵdaı ýshyqqan kúıinde tur. «Qyzyl aımaqtyń» sanatynan shyǵa almaı otyrǵan jaı bar.

– El shetine indet kelgeli tek oblys ortalyǵynda 12 463 adamnan koronavırýs zerthanalyq jolmen anyqtaldy. Qyrkúıek aıynda 856 oqıǵa tirkelip, 79 balanyń dertke shaldyqqany belgili bolǵan. Sońǵy táýlikte 67 jaǵdaı zerthanalyq jolmen anyqtalsa, 3 adam indettiń qurbany boldy. Indetpen alysyp jatqan qalalyq aýrýhanalarda ázirlengen tósektik oryn­dardyń júktemesi 49 pa­ıyzdy qurap otyr. Stasıonarlarda 199 adam em qabyldaýda, olardyń 25-i  – rea­nımasııa bólimderinde. Aýyryp jatqandardyń 99 pa­ıyzy – ekpe egilmegen turǵyndar. Mine, osy derekten-aq indetten aman qalýdyń jalǵyz joly ekpe alý ekendigin aıqyn ańǵa­rý­ǵa bolady, – deıdi qalanyń bas­ sanıtarlyq dárigeri Qanat­ ­Ysqaqov. – Jańa oqý jy­ly­ bastalǵaly qaladaǵy orta mektepterde bilim alyp júr­gen ondaǵan oqýshynyń indet juqtyrǵany anyqtaldy. Olardyń 75-i shtat­tyq rejimde, 4-eýi qashyqtan bilim alyp júrgen. Osylaısha, 68 synyp karantınge jiberildi.

Vaksınalaý indettiń aldyn alýdyń basty qarýy ekenin taǵy bir márte ekpin túsirip aıt­saq, artyqtyǵy bolmas. Ekpe alýǵa barlyq jaǵdaı jasalyp otyr. Oblys ortalyǵynda koro­navırýsqa qarsy ekpe egý úshin 12 stasıonarlyq ekpe pýnkti men 1 jyljymaly keshen jabdyqtalǵan. Qazirgi ýaqytta Saryarqa shaǵyn aýda­nyn­da jyljymaly keshen tur­ǵyn­darǵa ekpe egýde. Bul jyljymaly nysan 1-1,5 apta osy shaǵyn aýdanda tursa, keıin basqa aýdandarǵa baryp, sol aýmaqtyń turǵyndaryna ekpe ekpek.

22 qyrkúıektegi málimet boıynsha qalada koronavırýsqa qarsy vaksınanyń birinshi bóli­gi­men 66 744 adam qam­ty­lypty. Bul ekpe alýǵa densaýlyǵy jaramdy adamdardyń 56 pa­ıy­­zyn quraıdy. Jaýapty naý­­qan bastalǵaly qanshama qulaqqaǵys jasalyp, jerine jete túsindirilip, barlyq jaǵ­daı týdyrylsa da, nemqu­raı­dy­lyq áli de bel alyp tur. Tipti aǵzasynda aýrýy bar eke­­­nin biletin adamdardyń qala kóshelerinde emin-erkin júr­ge­nin qalaı túsinýge bolady. Ázirge mundaı salǵyrttyqtyń soqpaǵyn Ashyq qosymshasy kesip tur. Aıtalyq qaladaǵy 80-nan asa kásipker Ashyq-ty paıdalanyp, kásipterin dóń­ge­letýde. Sońǵy derekterge qa­ra­ǵanda, qosymsha ornatylǵan qoǵamdyq oryndarǵa barǵan 690 adamnyń karantındik oqshaýlaý tártibin buzýshylar ekeni anyq­talǵan. Osynshama, adam dert­ti bolyp júrse de, ózgeniń ja­ıyn oılamaǵany qalaı? Bere­ke­sizdik beleń alǵan jerde dúm­pýi azaımaı turǵan dertti se­ıiltý qıynǵa soǵary anyq. Qosymsha arqyly anyqtalǵan naýqasqa shaldyqqandardyń 553-i «qyzyl», 157-i «sary» mártebesimen kópshilik oryndarda júrgen. Talap buzǵandarǵa 30 AEK mólsherinde aıyppul salynypty.

Aıyppul arqalaǵanymen, aıyby – besbatpan. О́ziniń de, ózgeniń de densaýlyǵyna ki­ná­rat keltirmeýdi oılaǵan abzal bolar.

Kókshetaý