«Til jáne táýelsizdik» kórme-baıqaýy márege jetti

Til saraıynyń aldynda qyl­qa­lam sheberleriniń týyndylary qo­ıylǵan «Til jáne táýelsizdik» atty kór­meniń ashylý saltanaty boldy. Kór­meniń lenta qııý rásimine ob­lys­­tyq máslıhattyń hatshysy J.Jór­genbaev, Memlekettik Eltańba avtory J.Málibekuly, Qazaqstan Sýretshiler odaǵy­nyń tóraǵasy О́.Jubanııazov, qoǵam qaıratkerleri men belgili til ja­na­shyrlary Orazkúl Asanǵazy jáne Asyly Osman qatysty.

Elge, jerge degen súıispenshilik já­ne jas urpaqtyń rýhanı mádenıetin damytý maqsatynda uıymdastyrylǵan qylqalam sheberleriniń «Til jáne táýelsizdik» baıqaýy qoǵamdaǵy qa­zaq tiliniń damý taqyrybyn ashý, táýel­sizdiktiń sımvolyna aınalǵan memle­kettik tilge degen qyzyǵýshylyq pen qurmetke beıneleý óneri arqyly tár­bıeleýdi maqsat tutady. Bul jo­ly baıqaýǵa 109 sýretshi qatysyp, olar­dyń qylqalamynan týǵan 164 kartına kórermen nazaryna usynyldy. Qatysýshylardyń eń úlkeni Túrkistan oblysy Túlkibas aýdanynan kelgen 66 jastaǵy turǵyn bolsa, eń kishi qaty­sýshy 9 jasar Mańǵystaý oblysy Jańa­ózen qalasynan kelgen mektep oqýshysy boldy.

– «Bulaq kórseń kózin ash» degendeı, talant jas talǵamaıtynyn eskere otyryp, baıqaýǵa kásibı sýretshilermen qatar oqýshy, stýdent jastarǵa qatysýǵa jáne ár qatysýshyǵa birneshe týyndy usynýǵa múmkindik berildi. Alamanǵa keń baıtaq elimizdiń ár túkpirinen qylqalam sheberleri at qosty. Shyǵys Qazaqstan, Mańǵystaý, Túrkistan, Qostanaı, Pavlodar, Aqtóbe, Almaty oblystary men Almaty, Nur-Sultan qalalarynan kelgen týyndylardyń jazý tehnıkasy da ártúrli boldy, olar maıly boıaý, akvarel, grızal, shyny, ımpato, sondaı-aq sándik qol­danbaly óner stılindegi jumystar retinde erekshelendi, – deıdi oblystyq Tilderdi damytý basqarmasynyń basshysy Bolat Kerimbek.

Baıqaýda sýretshi Marat Abdreev­tiń «Babalar armany» kartınasy eń úz­dik dep tanylyp, baıqaýdyń bas júl­desin qanjyǵalady. 1-orynǵa О́mirbek Jubanııazov ıe boldy. 2-oryndy Aınur О́mirzaq pen Aıjan Bazarbekova enshiledi.