Onyń sýretteriniń bári – tiri. Tipti, sizge til qatyp turǵandaı, áldebir oıdyń áýenin eske salady. Boıaýdy kenepke tógerde aıqyn hám shynaıy. Sodan ba zamanaýı týyndylardyń birindeı kórinedi. Áıtse de ol – XIX ǵasyrdyń adamy. Alýan tústerdiń arpalysynan lázzat alyp, kórkem ónerdiń kerýenine ilesken Klod Mone. Bul – dańqty sýretshiniń «Joly».
Kartınanyń qupııasy da sol, qolmen ustaǵandaı sol sátti kózben kórgendeı etip oryndalýynda. Altyn kúnniń jarqyraǵan sáýlesine shomylǵan kúzgi orman kórinisi. Sýretshi úshin meıirimdi mezgil, mereıli mezet. Ártúrli formada jerge kilemdeı jaıylǵan jumsaq japyraqtar merekelik kóńil kúı syılaıdy. Azdap saǵynysh ta bar. Jazdan qalǵan estelikter qońyz kúzdiń aspanynda qalyqtaıdy. Sulýlyq hám tynyshtyqpen tynystaǵan tabıǵattyń tańǵajaıyp keıpi jaǵymsyz oıdan tazarýǵa jol ashyp turǵandaı.
Tústerdiń muńdy jáne jumsaq reńkteri qyzyqty kombınasııa túzgen. Sýretshi jumsaq sarǵyshtyqpen suıyltylǵan jyly qońyr hám jasyl reńkterdi qoldanady. Keskindemede oń jaq buryshynda peızajǵa tán balǵyndyq bar. Ony ýyljyǵan jasyl túster aıshyqtap tur. Aspanda sur reńkter basym bolǵanyna qaramastan, munda jylý men meıirim, saǵynysh pen súıispenshilik uıalaǵan. Sýret jazdyń ótkenin habarlap turǵandaı. Kúzdiń qara sýyǵy kelse de árbir mezgilden janyńyzǵa rahat izdeýge shaqyrady.
Bul keskindeme «Tabıǵat aıasyndaǵy tańǵy as» reprodýksııasy negizinde jazylǵan. Oqyrmandy eliktirip áketetin detaldarǵa toly. Ashyq aspan aıasynda kúzdiń sulý beınesine kóz qadap, tamsanýǵa eshkim kedergi jasamaıdy. Ý da shý qalanyń qarbalasynan qashyp, tynyshtyqqa boısuný. Keskindemege qarap, óz oılaryńyzben serýendep, jasyryn tilekterińizdi únsiz tabıǵatqa jaıyp salýyńyzǵa bolady. Fransýz sýretshisi Klod Mone osyny aıtqysy kelgendeı.
Bul – kúz ben sýretshiniń bir-birine degen móldir mahabbaty.