23 qyrkúıek kúni keshke Elbrýsta kómek suraǵan alpınıster tobyndaǵy qaza tapqandar sany bes adamǵa jetti, dep habarlaıdy Egemen.kz TASS agenttigine silteme jasap.
RF TJM Kabardıno-Balkarııa boıynsha bas basqarmasynyń bastyǵy Mıhaıl Nadejın málim etkendeı, 19 adamnan turatyn alpınıster toby Kabardıno-Balkarııadaǵy Elbrýs baýraıynda 5400 m bıiktikte bolǵan. Qatysýshylardyń jasy 30-dan asady, olar Reseıdiń 11 aımaǵynan kelgen.
Sońǵy málimetter boıynsha, toptyń bes múshesi qaıtys boldy, kóptegen alpınıster jaraqat alyp, qatty aıazdan qaltyrady. Segiz adamnyń jaǵdaıy ortasha aýyr. Toptyń qutqarylǵan músheleri qaza tapqandar jatqan jerdi kórsetti. Qutqarýshylar kelgen kezde zardap shekkender ómir belgilerin kórsetpedi.
«Gara-Bashı» stansııasynda 3 900 metr bıiktikte Apattar medısınasy dárigerleri ólimdi anyqtady», dedi Nadejın.
Nadejın izdestirý-qutqarý jumystary barysynda 14 adamdy taýyp, tómen jetkizip, dárigerlerge tapsyrǵanyn atap ótti. Olardyń 11-i Nalchıktegi respýblıkalyq klınıkalyq aýrýhanaǵa jetkizildi, al úsheýi aýrýhanaǵa jatýdan bas tartty. Onyń aıtýynsha, Elbrýstaǵy izdestirý-qutqarý jumystary jeti saǵattan astam ýaqytqa sozyldy. Izdestirýge barlyǵy 69 adam men 16 birlik tehnıka tartyldy.
Eske sala ketsek, jaqynda Elbrýs baýraıynda alpınıster aýa-raıynyń qolaısyzdyǵyna tap bolyp, qutqarýshylardan kómek surady. Oqıǵa ornyna izdestirý-qutqarý toby shyqty. Keıinirek qutqarýshylar taýda bolǵan 19 adamnan turatyn toptyń barlyq múshelerin taba alǵany belgili boldy.
Aldyn ala aqparat boıynsha, alpınıster tobyn ertip júrgen gıd olardy tastap, tómen qaraı ketip qaldy.