«Talıban» qozǵalysy Reseıden BUU sanksııalaryn alyp tastaýǵa jáne eldi qalpyna keltirýge kómek berýin surady, dep jazady Egemen.kz.
Bul týraly RIA Novostı agenttigine bergen suhbatynda Aýǵanstan ýaqytsha úkimetiniń Mádenıet jáne aqparat mınıstriniń orynbasary Zabıýlla Mýjahıd aıtty.
«Ol (Reseı) biz ben BUU arasyndaǵy sanksııa qysymynyń deńgeıin tómendetý máselesinde jańa deldal bola alady, sonymen qatar biz odan aımaqtaǵy, ásirese Aýǵanstandy qaıta qurý prosesindegi jaǵdaıdy beıbit jolmen retteýge kómektesýin suraımyz», dedi Mýjahıd.
Mınıstrdiń orynbasarynyń aıtýynsha, Islam Respýblıkasynyń úkimeti BUU Qaýipsizdik Keńesiniń aldaǵy otyrystarynda Kabýl úshin «naqty oń nátıjeler» bolatynyna senedi.
О́z kezeginde Reseıdiń halyqaralyq uıymdaǵy ókili Vasılıı Nebenzıa Aýǵanstannan sanksııalardy alyp tastaý máselesi áli kún tártibine shyqpaǵanyn aıtty. Onyń aıtýynsha, qazirgi kezdegi eń ózekti másele – elge gýmanıtarlyq kómek kórsetý.