Reseı astanasy - Máskeýde bokstan áskerıler arasynda álem chempıonaty aıaqtaldy. Bul jarysta Qazaqstan quramasy jeti júldemen qorytyndylady. Tarqatyp aıtsaq, Birjan Jaqypov jattyqtyrǵan komanda 3 altyn, 1 kúmis jáne 3 qola medaldi oljalady. Osyndaı zor tabysynyń arqasynda jerlesterimiz jalpy esepte úzdik úshtiktiń qatarynan kórindi.
Jartylaı fınaldyq saıysta qazaqstandyqtar arasynan alǵashqy bolyp rıngke 69 kılo salmaq dárejesinde baq synaǵan Jasmın Qızatova kóterildi. Qazaqstannyń áıelder qurama komandasy músheleri arasynnan jalǵyz sol sportshy ǵana osy mejege deıin jetken edi. Biraq odan árige Jasmınniń áli jetpedi. Ol brazılııalyq Barbara Marııa dos Santostan utyldy. Erler saıysynda Rýstem Shaýmenov (56 kılo) pen Aıtjan Áshirhan (64 kılo) qola medaldi qanaǵat tutty. Rústem reseılik Ovık Oganesıanǵa jol berse, ózbekstandyq Mýdjıbıllo Týrsýnov Aıtjannan aılasyn asyrdy. Bul mejede súringenderdiń barlyǵy da qola medaldi moıyndaryna ildi.
Azııa chempıony Temirtas Júsipovtiń (49 kılo) reseılik Volodıa Mnaskanıannan mereıi ústem bolsa, Damır Ábdirqadyr (52 kılo) ırlandııalyq Shon Iman Marıden basym tústi. Tımýr Nurseıitov (75 kılo) pen fransııalyq Moreno Fendero arasyndaǵy báseke barysynda qazaqstandyq jankúıerlerdiń biraz qobaljyǵany ras. О́ıtkeni, ekinshi raýnda qandasymyz nokdaýn alyp qaldy. Biraq namysty qoldan bermegen ol úshinshi raýnda qarsylasyn qýyp júrip sabady. Nátıjesinde rıngtegi tóreshi Tımýrdyń qolyn kóterdi. Abzal Quttybekov te (91 kılo) sol keshte ózin jaqsy qyrynan kórsetti. Ol Fransııa boksshysy Soheba Boýafııanyń betin qanǵa boıap, óziniń myqtylyǵyn pash etti.
Fınalda Temirtas Lınderso Konseısao Sıkýeıra dos Samen saıysqa tústi. Bul básekede qazaq jigitiniń myqtylyǵy eg kúmán týǵyzǵan joq. Qalǵan boksshylarymyzdyń barlyǵy da Reseıdiń jýan judyryqty jigitterimen qolǵap túıistirdi. Damır reseılik Dmıtrıı Dvalıdy utqan edi. Tóreshiler jerlesimizdiń jeńimpaz dep jarııalaǵanymen, arada birer ýaqyt ótkennen soń qarsy jaq protest jazdy. Qazylar alqasy biraz oılana-tolǵana kele jeńisti Dvalıge berdi. Tımýr Alekseı Smykınge san soqtyrsa, Reseıdiń Abzal Ivan Sagaıdakty silikpesin shyǵardy.
Máskeýdegi jarystyń jalpy komandalyq esebinde Reseı quramasy kósh bastady. Rıng qojaıyndary 4 altyn, 4 kúmis jáne 1 qolany oljalady. Ekinshi jáne úshinshi oryndy Qazaqstan men О́zbekstan ózara bólisti. Bas júldeniń bireýin ıelengen Belarýs eliniń boksshylary tórtinshi satyǵa jaıǵasty.