Krasnodar ólkesinde Ekaterınbýrgten Sochıge ushyp bara jatqan ushaqqa naızaǵaı tústi. Ushaq Krasnodar áýejaıyna shuǵyl qondy, dep habarlaıdy Egemen.kz.
25 qyrkúıekte ZF347 reısi Ekaterınbýrgten Sochıge jolaýshylardy jetkizýi kerek edi. Biraq naızaǵaıǵa baılanysty kýrorttaǵy áýejaı ushaq qabyldaýdy ýaqytsha toqtatqan. Ushaq ekinshi ret aınalǵan kezde, áýe kemesine naızaǵaı túsken.
Reıs jolaýshylary naızaǵaı túsken sátte bortta bolǵan jaǵdaıdy vıdeoǵa túsirip alǵan. Olar «umytylmas» áseri týraly aıtty.
«Janymdaǵy áıel shoqyna bastady. Men de qoryqqanymnan duǵalardy esime túsirdim. Naızaǵaı soqqanda men burylyp qaldym. Jaqyn jerde bir jigit otyrǵan, onyń kózin kórseńiz. Bul ómirbaqı esimnen shyqpaıdy», dedi basylymǵa jolaýshylardyń biri.
E1 basylymyna suhbat berýshilerdiń aıtýynsha, ushaq sur bulttar arasynan ótip bara jatqanda, oǵan naızaǵaı túsken.
«Naızaǵaı anyq kórindi jáne jarqyl estildi. Adamdar qorqyp ketti, keıbireýler qozǵaltqyshqa birdeńe boldy dep oılady. Sodan keıin óte qatty quldyraı bastadyq, qulap bara jatqanymyzdy sezdik», dep bólisti jolaýshy Anastasııa.
Onyń aıtýynsha, beldikti durys taqpaǵandar ornynan sekire bastaǵan, bótelkedegi sý men stakandar qulaǵan.