Elimiz táýelsizdiginiń 30 jyldyq dataly merekesi aıasynda, Mádenıet jáne sport mınıstrligi «Adaldyq alańy» jobalyq keńsesiniń parasattylyq mádenıetin ilgerletýge arnalǵan vedomstvoaralyq is-sharalar jospary boıynsha, elordadaǵy Ulttyq kitaphanada «Meıirim pálsapasy» atty týyndynyń tusaýy kesilip, atalmysh sharaǵa Parlament Senat jáne Májilis depýtattary, elimizge tanymal ǵalymdar, sondaı-aq zııaly qaýym ókilderi qatysty.
Mańyzdy sharany ashyp sóz sóılegen Mádenıet jáne sport vıse-mınıstri Nurǵısa Dáýeshov óz sózinde: ««Adam násilin jer betinde baıandy etip turǵan birden-bir kúsh meıirim men raqym» dep belgili qoǵam qaıratkeri, jazýshy Ábish Kekilbaı aıtqanyndaı, búgingi tusaýy kesilip otyrǵan týyndy adamdardyń rýhyn oıatyp, izettilikti, izgilikti dáripteýde úlgi-ónege bolary anyq. Týyndy avtory Úzben Qurmanbaıuly zeınetkerlik jasyna qaramaı, tynymsyz eńbek etip, qoǵamnyń damýyna úles qosyp kele jatqany qýantarlyq», dep ıgi nıetin bildirdi.
Osy rette tusaýy kesilip otyrǵan týyndynyń mazmunyna toqtalsaq: jeti bólimnen turatyn eńbekte avtor meıirimdi qoǵam qurýǵa qatysty negizgi faktorlardy túgel jýyq qamtı alǵan. Birinshi bóliminde Jaratýshynyń meıirimdilik zańdylyǵyna negizdelgen meıirim pálsapasynyń mańyzyna toqtalyp, onyń kúlli adamzat balasyn baqytqa, baılyqqa bastaıtyn aq jol ekenin aıqyndaýǵa kóńil bólingen.
Ekinshi bólimde, búgingi ómir súrip otyrǵan qoǵamymyzdaǵy sybaılastyq, jemqorlyq keleńsizdikterge taldaý jasaı otyryp, halyqty, áýelgi kezekte memlekettik qyzmettegi laýazym ıelerine meıirim, izgilik qalyptastyrý joldaryn qarastyrady.
Úshinshi bólimde, izgilik turǵysyndaǵy álemdik oıshyldar men qazaq danalyǵynyń bir-birimen ushtasyp jatqanyn dáleldeı otyryp, qazaq pálsapasyn bizdiń táýelsiz memleketimizdi qorǵap saqtaýdyń, damytýdyń kilti retinde qarastyrady.
Tórtinshi bólimde, memleket pen halyq arasyndaǵy ózara baılanysyn nyǵaıtýdyń joldary qarastyrylady. Al kelesi bólimderde búgingi qoǵamdaǵy basty kemshilik – qoǵamdyq qatynastaǵy alaýyzdyq, baqtalastyq, kóre almastyq sııaqty jat pıǵyldardyń saldary, muny joıýdyń joldary, ulttyq tilimizdiń memleket qalyptastyrýdaǵy róli týraly aıtylady.
Kitaptyń sońǵy bóliminde avtor meıirimdi qoǵam qurýdyń irgetasy retinde «Nur-Sultan qalasyn meıirimdi qalaǵa aınaldyrýdyń tujyrymdamasyn» usynady. «Jaratqannan berilgen meıirimdilik zańdylyǵyn, ony dáriptegen ultymyzdyń burynǵy-sońǵy oıshyldarynyń ıdeıasyn ómirde júzege asyrý, qalyptastyrý arqyly qoǵamdyq qatynastaǵy kinárattyń bárinen aıyǵýǵa, qoǵamdy túzeýge bolady», degen ıdeıany negiz etken bul kitap aldaǵy kúnderi oqyrmandarynan óz baǵasyn alary sózsiz.