Grekııanyń eń úlken araly – Krıtte 5,8 balldyq qatty jer silkinisinen shirkeý kúmbezi qulap, bir adam qaıtys boldy. Adamdar úılerin, qoǵamdyq ǵımarattardy tastap shyǵýǵa májbúr bolǵan. Apat aıtarlyqtaı zııan keltirgen.
Jer silkinisin grek seısmology Eftımıos Lekkas «naızaǵaı» sekildi dep sıpattaǵan eken. Polısııa ókili Arkalohorı qalasyndaǵy jóndeý jumystary júrip jatqan shirkeýdiń kúmbezi qulap, er adamnyń qaıtys bolǵanyn habarlady. Kóptegen ǵımaratqa zalal keltirgen jer silkinisi saldarynan toǵyz adam jaraqat alǵan. Jerasty dúmpýleri kezinde Krıttiń bas qalasy Iraklıonnyń turǵyndary kóshege qashýǵa májbúr bolǵan, al oqýshylar mektep aýlalary men qalalyq alańdarǵa jınalǵan.
Afınanyń geodınamıkalyq ınstıtýty jer silkinisiniń magnıtýdasy 5,8-ge jetkenin jáne onyń epısentri Krıttiń ońtústik-shyǵysyndaǵy Arvıden soltústik-batysqa qaraı 23 km (14 mıl) jerde, 10 km tereńdikte bolǵanyn habarlady. Buǵan deıin Eýropalyq Jerorta teńizi seısmologııalyq ortalyǵy (EMSC) 6,5 balldyq jer silkinisi bolǵanyn aıtqan, al AQSh Geologııalyq qyzmeti (USGS) ony 6,0 dep baǵalaǵan.