Lıondaǵy tamaqtaný men qonaqúıler kórmesine kelgen Fransııa prezıdenti Emmanýel Makronǵa belgisiz bireý jumyrtqa laqtyrdy, dep jazady Egemen.kz.
«Jumyrtqa Prezıdenttiń ıyǵyna tıdi, biraq jarylǵan joq», dep jazady BFM TV.
Qaýipsizdik qyzmeti kinálini anyqtap, kópshiliktiń arasynan shyǵardy. Ol «Revolıýsııa jasasyn!», dep aıqaılaǵan. Kúdiktige «memlekettik bıliktegi adamǵa zorlyq-zombylyq kórsetti» degen aıyp taǵylǵan.
Osy jyldyń maýsym aıynda memleket basshysynyń Drom departamentine sapary kezinde bir adam Emmanýel Makrondy shapalaqpen tartyp jibergen bolatyn. Sot 28 jastaǵy Damıen Tareldi tórt aıǵa bas bostandyǵynan aıyryp, taǵy 14 aıǵa shartty túrde bas bostandyǵyn shektedi. Bul oqıǵadan soń Makronnyń bári jaqsy ekenin aıtyp, provakasııa jasamaýǵa shaqyrdy.