Qyrǵyzstan Prezıdenti Sadyr Japarov temeki shegýge qarsy kúres týraly zańǵa qol qoıdy. Bul týraly «Kabar» agenttiginde ótken baspasóz máslıhatynda Ulttyq kardıologııa jáne terapııa ortalyǵynyń dırektory Aqpaı Sarybaev málim etti, dep habarlaıdy Egemen.kz.
«Men barshańyzdy 3 kún buryn Prezıdent Sadyr Japarovtyń temeki shegýge qarsy kúres týraly zańǵa qol qoıýymen quttyqtaımyn. Bul júrek-qan tamyrlary aýrýlary men qaterli isikke qarsy kúrestegi úlken jeńis. Bul zań kóptegen sharalardy qamtıdy», dedi ol.
Parlament saıtynda Qyrǵyzstan parlamentiniń depýtattary 29 shildedegi otyrysta «Qyrǵyz Respýblıkasy azamattarynyń densaýlyǵyn temeki, nıkotın jáne aerozoldiń áserinen saqtaýǵa» qatysty zańǵa túzetýler engizgeni jaıly jazylǵan.
Zań jobasy boıynsha qoǵamdyq oryndarda temeki ónimderin, onyń ishinde elektrondy temeki, kalıan jáne qospalardy qoldanýǵa tyıym salynady. Sonymen qatar kafe men meıramhanalarda kalıanǵa tyıym salynady.