Qyzylordada el Táýelsizdiginiń 30 jyldyǵy men Syr súleıi Kete Júsip Eshnııazulynyń týǵanyna 150 jyl tolýyna arnalǵan «Jyrlansyn, Táýelsizdik jyr bulaǵy» atty respýblıkalyq jyrshy-jyraýlar baıqaýy ótti. Nartaı Bekejanov atyndaǵy oblystyq mýzykalyq drama teatrynda uıymdastyrylǵan baıqaýǵa elimizdiń ár túkpirinen dástúrli ónerdi dáriptep júrgen ónerpazdar qatysyp, kórermendi dańǵyl jyraýdyń mol murasynan sýsyndatty.
Jyrshy-jyraýlar baıqaýynyń ashylý rásiminde oblys ákimi Gúlshara Ábdiqalyqova saıysqa qatysýshylarǵa sáttilik tiledi.
– Ejelgi uzandardyń izi qalǵan, úni saqtalǵan Syrda dástúrli jyrdyń baıraǵy bıik turatyny belgili. Qobyz sarynynan dúnıe tylsymyn izdegen Qorqyttan bastaý alatyn baǵzy ónerdiń rýhanı qazynaǵa aınalýyna ólsheýsiz eńbek etken Shoraıaqtyń Omary, Balqy Bazar, Qarasaqal Erimbet, Kete Júsip, Dúr Ońǵar, Turmaǵambet, Nurtýǵan men Nartaıdaı dúldúlder dúnıege kelgen topyraqtaǵy búgingi jyr saıysy dástúrli muranyń óshpeıtindigin aıǵaqtaıdy, – dedi oblys ákimi.
Jyr dodasynda baǵzy ónerdiń álemdik deńgeıde nasıhattalýyna úles qosyp, jyr kerýenine talaı talantty shoǵyrdy tárbıelep qosqan belgili jyraý, Qazaqstannyń eńbek sińirgen qaıratkeri, Qurmanǵazy atyndaǵy Qazaq ulttyq konservatorııasy jáne Qazaq ulttyq óner ýnıversıtetiniń professory Almas Almatov, Qazaqstannyń eńbek sińirgen qaıratkeri, ónertaný ǵylymdarynyń kandıdaty, Qazaq ulttyq óner ýnıversıtetiniń professory Elmura Jańabergenova, Qazaqstannyń eńbek sińirgen qaıratkeri, fılologııa ǵylymdarynyń kandıdaty, Qurmanǵazy atyndaǵy Qazaq ulttyq konservatorııasynyń aǵa oqytýshysy Uljan Baıbosynova, qoǵam qaıratkeri, óner janashyry Rzaqul Nurtaev, jyrshy-jyraý, «Mádenıet salasynyń úzdigi» tósbelgisiniń ıegeri Maıra Sársenbaeva qazylyq etti.
Jyr dodasyna Aqtóbe qalasynan Demeýbaı Jolymbetov, Mańǵystaýdan Amangeldi Sáńkibaev, Kereký óńirinen Bóken Jiger, Almaty qalasynan Baqyt Toǵjanova, Qyzylorda qalasynan Ádilhan Qýańbaev, Bolat Baımuratov, Serik Jaqsyǵulov, Jaqsan Jánibek, Malıka Aldamjarova, Aral aýdanynan Aıbek Táńirbergenov pen Beksultan Orynbasar, Shıeliden Muhamedáli Bekpeıisov, Qarmaqshy aýdanynan Álisher Myrzaǵalıev qatysyp, Júsip Eshnııazulynyń buryn-sońdy kóp oryndalmaı júrgen aıtys, termeleri men «Sháhzada», «Surmergen», «Meker qatyn» dastandaryn oryndady.
Qazylar alqasynyń tóraǵasy Almas Almatov Syr súleıiniń mol murasyn nasıhattaýda úsh býyn ókilderiniń basyn qosqan búgingi is-shara aımaqtyń mádenıet salasyndaǵy aıtýly bastamasynyń biri bolǵandyǵyn atap ótti.
– Buryn oryndaýshylarymyz konserttik júıe boıynsha 4-5 mınýt qana óner kórsetip, múmkindigin tolyq kórsete almaı jatatyn. Bul joly sahnaǵa shyqqandarǵa jarty saǵat ýaqyt berildi. Alda jyrshy-jyraýlardyń aldyna qoıatyn maqsat, mindetter kúrdelene bermek. Mysaly, Aqtóbe oblysynda «Qyrymnyń qyryq batyryn» 30 jyrshy-jyraý
60 saǵat jyrlady. О́ner ıesin kemeldendirip, sheberligin shyńdaı túsetin osyndaı bastama Syrda da qolǵa alynyp jatyr, – dedi jyraý.
Osy kúni «Jyrlansyn, Táýelsizdik jyr bulaǵy» atty respýblıkalyq baıqaý óz máresine jetti. Qazylar alqasynyń sheshimimen bas júlde araldyq Aıbek Táńirbergenovke tabystaldy. Birinshi oryn qyzylordalyq Serik Jaqsyǵulovqa berilse, II oryndy aqtóbelik Demeýbaı Jolymbetov jeńip aldy. III oryndy Pavlodar qalasynan Bóken Jiger, Qyzylorda qalasynan Jaqsan Jánibek jáne Aral aýdanynan Beksultan Orynbasar ózara bólisti. Qalǵan qatysýshylarǵa yntalandyrý syılyǵy buıyrdy.