Júıeli qurylǵan kompozısııa ári durys tańdalǵan rakýrs – sátti kadrdyń kepili. Fototilshiniń boıynda bolýy tıis osy jáne ózge de qasıetter men daǵdylar jaıly Eýrazııa Ulttyq ýnıversıteti uıymdastyrǵan ZEREN-photo-fest baıqaýynda jan-jaqty saraptaldy.
Eki kúnge sozylǵan fototilshilerdiń shyǵarmashylyq saıysynda jýrnalıstıka jáne dızaın mamandyqtaryn meńgerip jatqan stýdentter úzdik sheberlermen tájirıbe almasyp, fotoportret, peızaj, fotoreportaj, fotoocherk syndy janrlarda sátti kadr shyǵara bilýdiń tásilderi men daǵdylaryna qanyqty.
Atap aıtqanda, fotoónerge beıili bar jastarǵa Sovetbek Maǵzum, Shúkir Shahaı, Orynbaı Balmurat syndy otandyq fotojýrnalıstıka maıtalmandarynyń sheberlik saǵattaryna qatysyp, kásibı keńes alýǵa múmkindik týdy.
Tórt kezeńnen turǵan baıqaýda qatysýshylar arnaıy tapsyrmalardy oryndap, bar ónerin ortaǵa saldy.
Eltańba avtory Jandarbek Málibekov bastaǵan qazylar alqasy usynylǵan jumystardy tabıǵat kórinisterindegi gorızont, rakýrs, kompozısııa, aldyńǵy jáne artqy plan, dıagonaldar erejesiniń saqtalýy syndy talaptarǵa sáıkes baǵalap, úzdikterdi anyqtady.
Aıtalyq, «Úzdik fotoportret» janrynda «Egemen Qazaqstan» gazetiniń fototilshisi Erlan Omarov top jardy. «Úzdik fotopeızaj» atalymynda National Geographic jýrnalynyń fototilshisi Erbolat Shadrahov jeńimpaz dep tanylsa, «Úzdik fotoetıýd» sanatynda «Arqa ajary» gazetiniń fototilshisi Sovetbek Maǵzum birinshi oryn ıegeri atandy. «Úzdik fotoreportaj» janrynda Tengrinews aqparattyq saıtynyń fototilshisi Turar Qazanǵapovtyń jumysy joǵary baǵaǵa ıe boldy. «Úzdik fotoocherk» atalymynda Kazaknews.kz fototilshisi Doǵan Iyldyz birinshi oryndy ıelendi. «Úzdik fototilshi» júldesi Premer-Mınıstrdiń fototilshisi Shúkir Shahaı men «Egemen Qazaqstan» gazetiniń ardageri Orynbaı Balmuratqa berildi. Sondaı-aq úzdik atanǵan stýdentterdiń de eńbegi baǵalaýsyz qalǵan joq.