Nur-Sultanda qala basshylyǵynyń qoldaýymen Bahreın Koroldigimen birlesip salynǵan №91 mektep-gımnazııasy ashyldy, dep jazady Egemen.kz.
Anatolıı Hrapatyı kóshesinde ornalasqan jańa mektep 1200 oqýshyǵa arnalǵan.
Oqý ornynyń resmı ashylý saltanatyna elorda ákiminiń orynbasary Ashat Oralov jáne elimizdiń Koroldik gýmanıtarlyq qorynyń Bas hatshysy, doktor Mustafa ál-Saıd bastaǵan Bahreın Koroldiginiń delegasııasy qatysty.
«Bıyl elimiz úshin erekshe jyl. El Táýelsizdiginiń 30 jyldyǵyn atap ótýdemiz. Mereıtoı qarsańynda elordada úlken jáne aýqymdy mekteptiń qurylysy aıaqtalyp, oqý prosesi bastaldy. Oqýshylar men pedagogtardy dástúrli formatta oqý jylynyń bastalýymen quttyqtaımyz. Pandemııaǵa baılanysty oqýshylar 1,5 jyldan astam ýaqyt qashyqtan oqýǵa májbúr boldy. Qazir oqýshylardyń joǵary deńgeıde bilim alýy úshin barlyq jaǵdaı jasalǵan. Biz árqashan osyndaı ıdeıalar men áleýmettik jobalardy qoldaýǵa daıynbyz. Bolashaqta baýyrlas eldermen osyndaı jobalardy odan ári júzege asyrýdy josparlap otyrmyz», dedi Ashat Oralov.
Jańa mektep ǵımaratynda 62 kabınet jáne 11 zerthana bar. Munda eńbek kabınetteri, qysh sheberhanasy, 418 oryndyq ashana, sport jáne akt zaldary, kovorkıng aımaǵy, lıngvıstıkalyq kabınetter jáne t.b. jabdyqtalǵan.
Mektep qazaq jáne orys tilinde oqytady. Negizgi oqytý tilderinen bólek arab, fransýz jáne nemis tilderi de oqytylady.
Ǵımarattyń úshinshi qabatynda 5 eldiń – Qazaqstan, Bahreın Koroldigi, Ulybrıtanııa, Fransııa, Germanııa mádenıetin dáripteıtin mektep murajaıy ornalasqan. Sonymen qatar, mektep kitaphanasynda 5 eldiń kórkem ádebıeti bar.
«Oqýshylarymyzdyń arab, aǵylshyn, nemis, fransýz sııaqty shet tilderin qosymsha oqýyna múmkindigi bar. Bizdiń kóptildilik tujyrymdamamyzdyń negizinde mekteptiń dızaıny da rásimdelgen. Birinshi qabat Qazaq handyǵy stıline bezendirilgen, ekinshi qabat – Bahreın Koroldigi, úshinshi qabat – fransýz tili, tórtinshi qabat – nemis tili. Maqsatymyz – balalardyń tolerantty bolýy jáne shetelde oqý múmkindigine ıe bolýy, sol sııaqty basqa elderdiń mádenıetine degen súıispenshiligin damytý. Biraq óskeleń urpaqtyń óz eliniń patrıoty bolýyna basa kóńil bólinedi. Mektep oqý úrdisine qajetti barlyq zattarmen tolyq jabdyqtalǵan, uldar men qyzdarǵa arnalǵan kórkem eńbek kabınetteri bar. Onyń ishinde – tigin sheberhanasy, aspazdyq daǵdylardy ıgerýge arnalǵan as úı, stanoktary bar metall jáne aǵash óńdeý sheberhanasy, qysh jáne t.b. bar», dedi №91 mektep-gımnazııasy dırektorynyń oqý-tárbıe isi jónindegi orynbasary Gúlnar Ahmetova.
Qazir mektepte 1 370 bala oqıdy. Oqytý – tegin.
«2021 jyly Nur-Sultanda barlyǵy 15 mektep paıdalanýǵa beriledi, bul 40 myńnan astam oqýshy ornyn quraıdy. Olardyń kópshiligi ashyldy», dep jazady qala ákiminiń resmı saıty.