Búgin Azamattyq bastamalardy qoldaý ortalyǵynyń alańynda aqparat jáne qoǵamdyq damý vıse-mınıstri Bolat Tlepovtyń tóraǵalyǵymen úkimettik emes uıymdardyń ókilderimen kezdesý bolyp ótti, dep jazady Egemen.kz.
Mınıstrlik tapsyrysymen júzege asyrylǵan jobalardy oryndaý barysy týraly máseleler talqylandy.
Bolat Tlepov áleýmettik mańyzdy máselelerdi sheshýde ózara is-qımyldyń mańyzdylyǵyn atap ótti.
«Grant alýshy bolý – úlken jaýapkershilik qana emes. Azamattyq bastamalardy qoldaý ortalyǵy jumys isteıtin barlyq jobalar áleýmettik júkteme turǵysynan óte mańyzdy. Jobalar sheńberinde mindetterdi oryndaý kezinde ÚEU túrli kedergilerge tap bolady. Biz búgin osy máseleler týraly bilýge, olardy sheshý joldaryn ázirleýge jınalyp otyrmyz», dedi vıse-mınıstr.
О́z kezeginde ÚEU ókilderi densaýlyq saqtaý, quqyqtyq jáne psıhologııalyq kómek, qoǵamdyq baqylaý júıesi, volonterlik qyzmet, tarıhı jáne mádenı nysandardy saqtaý, áleýmettik kásipkerlik, medıasııa salalarynda halyqty qoldaýǵa baǵyttalǵan jobalardyń iske asyrylý barysy týraly habardar etti.
Azamattyq bastamalardy qoldaý ortalyǵynyń tóraǵasy Lıma Dıas pandemııaǵa baılanysty engizilgen shekteý sharalarynyń saldarynan jobalardy júzege asyrý qarqyny kúıremegenin atap ótti.
«Qazirgi tańda biz 51 jobanyń operatory bolyp otyrmyz. Barlyq jobalar sheńberinde 187,5 mln teńge somasyna 298 shaǵyn grant berý josparlanǵan. Áriptesterimizben keri baılanys arqyly biz epıdemıologııalyq jaǵdaıdyń nasharlaýyna baılanysty qyzý jumystyń kóbi jazdan kúzgi kezeńge kóshirilgenin kórip otyrmyz. Sondyqtan qazir biz júzege asyrý qarqynyn arttyryp kelemiz», dedi ol.
Is-sharanyń qorytyndysy boıynsha Azmattyq bastamalardy qoldaý ortalyǵynyń qarjylyq kómegimen iske asyrylatyn jobalar boıynsha aralyq qorytyndylardy tyńdaý týraly sheshim qabyldandy. Talqylaýdyń kelesi raýndy qazan aıyna josparlanǵan.
Kezdesýge «TALAP» qoldanbaly zertteý ortalyǵy», «Qazaqstannyń Azamattyq Alıansy», «Qoǵamdyq mańyzdy bastamalar qory», «Ulttyq volonterlik jeli», «Áleýmettik taldaý jáne yntymaqtastyq ortalyǵy», «Aqtóbe oblysynyń úkimettik emes uıymdary qaýymdastyǵy», «MIR» aımaqaralyq medıasııa ortalyǵy», «Azamattyq bastamalar ortalyǵy», ÚEU-lar men «Mańǵystaý oblysynyń qoǵamdy damytý máseleleri jónindegi Azamattyq Alıansy» qaýymdastyǵy túrindegi ZTB men «Qyzylorda volonterleri» QQ ókilderi qatysty.