Qazaqstan Respýblıkasy Táýelsizdiginiń 30 jyldyǵy aıasynda, Mádenıet jáne sport mınıstrligi Arhıv isteri jáne qujattamany basqarý komıteti Qoljazbalar jáne sırek kitaptar ulttyq ortalyǵynyń uıymdastyrýymen Ulttyq ortalyqtyń qorynda saqtalǵan ǵylymı-mádenı muralardy keńinen nasıhattaý maqsatynda qoǵam qaıratkerleri, bas redaktorlar jáne elimizge belgili BAQ ókilderiniń qatysýymen «Uly Dala murasy» atty press-týr ótip, oǵan Parlament Senaty men Májilis depýtattary, belgili qalamger-jýrnalıster jáne sala mamandary qatysty, dep jazady Egemen.kz.
Arnaıy shaqyrylǵan qonaqtarǵa Qoljazbalar jáne sırek kitaptar ulttyq ortalyǵynyń dırektory Aınur Jarahmetova Ulttyq ortalyqtyń tynys-tirshiligi jaıly maǵlumat berse, Ulttyq ortalyqtyń kórme jáne oqý zalyndaǵy qoljazbalar jáne sırek kitaptardan turatyn qundy muralar jaıly Ǵylymı-zertteý bóliminiń sarapshysy Muhammedııar Ańqabaev, al qaıta qalpyna keltirý ǵylymı zerthanasyn restavrator mamany Janserik Beısenqulov tanystyrdy. Sonymen qatar arnaıy uıymdastyrylǵan dóńgelek ústelde Uly Dala tarıhyna qatysty muralardy jan-jaqty nasıhattaý jáne el ishindegi qoljazbalar, sırek kitaptar men kartalardy jınaqtaý, zertteý, qalpyna keltirý máseleleri talqylandy.
Onda L.Gýmılev atyndaǵy EUÝ professory, Qoljazbalar jáne sırek kitaptar ulttyq ortalyǵynyń ǵylymı keńesshisi Zada Dúkenbaeva atalǵan mekemedegi keıbir máselelerge arnaıy toqtalyp ótti.
«Ulttyq ortalyq – el tarıhy men mádenıeti úshin mańyzy zor mekeme. Sondyqtan da memlekettik deńgeıde qoldaýdy qajet etedi», dedi Parlament Májilisiniń depýtaty, «Miras» qoǵamdyq keńesiniń tóraǵasy Janarbek Áshimjan.
Sonymen qatar halyq qalaýlysy, Ulttyq ortalyqqa qatysty ózekti máselelerdi «Nur Otan» partııasynyń «Miras» qoǵamdyq keńesi tarapynan qoldaý bolatynan jetkizdi.
QR Prezıdenti baspasózi qyzmetiniń sarapshysy, aqyn Erbol Alshynbaı óz kezeginde ulttyq ortalyqtyń jumysyna zor qyzyǵýshylyq tanytyp, óziniń shaǵataı jazýynan (kóne túrki tilinen) aýdarǵan qazaq sultany Ahmet Kenesarınniń «Nasab name sultan Sydyq» atty eńbegin Ulttyq ortalyq qoryna syılady.
Sondaı-aq belgili telejýrnalıst Zeıin Álipbek ulttyq ortalyqtaǵy qundy muralardy BAQ betterinde jan-jaqty nasıhattaýǵa muryndyq bolatynyn aıtsa, «Tarıh portaly» saıtynyń bas redaktory Altynbek Qumyrzaq Qoljazbalar jáne sırek kitaptar ulttyq ortalyǵymen eki jaqty kelisim-shart jasaý negizinde «Tarıh portaly» saıtynda arnaıy aıdar ashyp tarıhı muralardy aqparattyq qoldaýǵa atsalysatynyn jetkizdi.