Qurlyqtyq hokkeı lıgasynda (QHL) kúsh synasyp júrgen «Barys» aldaǵy úsh kezdesýin túzde, ıaǵnı Reseıdiń Magnıtogorsk, Máskeý jáne Iаroslavl qalalarynda ótkizedi, dep jazady Egemen.kz.
Sársenbiden beısenbige qaraǵan túni Magnıtogorskidegi oıyndy tamashaladyq. Bul básekeni bizdiń jigitter óte jaqsy bastady. Alǵashqy eki goldy 5 jáne 23-mınýttarda Kertıs Volk pen Mett Frettın soqty. 24-mınýtta «Barystyń» bir oıynshysy kem bolǵan kezde Nıkıta Korostelev esep aıyrmashylyǵyn qysqartty. 27-mınýtta Kodı Kýnık mergendik tanytty. Biraq bul esepti ustap tura almadyq. Úziliske deıin «Metallýrgtiń» shabýylshysy Andreı Chıbısov nysanadan dál kózdese, úshinshi kezeńde aıdyn ıeleri taǵy eki shaıbany qaqpaǵa engizdi. Bul goldardyń avtorlary – Artem Zemchenok pen Brendan Leıpsık. Sóıtip, jerlesterimiz 3:4 esebimen aıdyn ıelerine ese jiberdi.
Qazirgi kezde «Barystyń» qorjynynda 10 upaı bar. QHL-dyń turaqty birinshiliginde olar 18-orynda keledi. Endi jerlesterimiz kelesi kezdesýin 3-qazan kúni Máskeýdiń «Dınamosyna» qarsy ótkizedi.