Bir ónimdi ekinshisimen sáıkestendirý úshin arnaıy kod qajet. Al onyń barynsha qaýipsiz jáne bıznes pen tutynýshylar úshin kóptegen artyqshylyqqa ıe bolýy mańyzdy.
Qazaqstanda taýarlardy tańbalap, qadaǵalaý úshin eki ólshemdi Data Matrix kody tańdaldy. Qazan aıynan bastap elimizde temeki ónimderine mindetti sıfrly tańbalaý qoldanylady. Qazirdiń ózinde Naqty Onim mobıldi qosymshasy arqyly kez kelgen ónim týraly barlyq qajetti aqparatty alýǵa jáne onyń zańdylyǵyna kóz jetkize alasyz.
Data Matrix kodynyń artyqshylyǵy qandaı degenge kelsek, QR kod, RFID belgiler jáne shtrıh-kod nusqalarymen salystyrǵanda ony qoldan jasaý múmkin emes. Buǵan shıfrlaýdyń krıptografııalyq tásilderi múmkindik berip otyr. Demek, atalǵan sıfrly tańbanyń qorǵanysh júıesi jan-jaqty qarastyrylǵanyn baıqaýǵa bolady.
Basqa analogtarmen salystyrǵanda Data Matrix kólemdi aqparatty qamtýǵa qaýqarly. Máselen, esepteýge arnalǵan aqparat 2 kılobaıtqa deıin jetýi múmkin.
Tehnıkalyq retteý jáne metrologııa komıtetiniń ókilderi aıtqandaı, taýarlardy sáıkestendirýdiń osy túri asa qymbatqa shyqpaıdy, ıaǵnı ony qoldaný tańbalanǵan taýarlardyń qunyna aıtarlyqtaı áser etpeıdi. Data Matrix kodynyń basty artyqshylyǵy – onyń kóleminde. Bul tańbany kishkentaı qaptamalar men zattańbalarǵa engizgen yńǵaıly. Osy eki ólshemdi kod túri qazir Eýropada, AQSh-ta, Reseıde, Belarýste jáne basqa da memleketterde qoldanylyp júr.