Sıfrly damý, ınnovasııalar jáne aeroǵarysh ónerkásibi mınıstrliginiń «Azamattarǵa arnalǵan úkimet» memlekettik korporasııasy turǵyn úı ıelerine tirkelgen azamattar men tirkeýden shyǵarylǵan turǵyndar týraly SMS-habarlamalar joldaıtyn jańa servısti engizdi.
Endi azamattar HQO arqyly tirkelgen kezde turǵyn úı ıesi óz telefonyna tirkelgen adamnyń derekteri kórsetilgen habarlama alady. Eger baspana ıesi úıinde turatyn adamdy tirkeýden shyǵarǵysy kelse, ekinshi tarapqa da tirkeýden shyǵarylǵany týraly habarlama barady.
«Qazaqstandyqtar maǵan úılerinde beıtanys adamdardyń tirkelgeni týraly jıi jazyp jatady. Atalǵan jańa servıs bul máseleni sheshýge tıis. Eger bireý sizdiń qatysýynsyz HQO arqyly úıińizge bógde adamdy tirkeýge tyryssa, siz bul týraly SMS-habarlama arqyly birden bile alasyz. Servıs aqyly túrde tirkeýdi usynatyn deldaldarǵa qarsy kúreste kómektesedi», dedi Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın.
«Azamattarǵa arnalǵan úkimet» memlekettik korporasııasy azamattarǵa turǵylyqty tirkeý qyzmetin 2019 jyldan beri kórsetip keledi. Buǵan deıin onymen HQO-da ornalasqan kóshi-qon qyzmetiniń mamandary aınalysqan bolatyn. Azamattardy turǵylyqty jeri boıynsha eGov portaly arqyly da onlaın tirkeýge nemese tirkeýden shyǵarýǵa bolady. Ol úshin turǵyn úı ıesi men tirkelgen adamnyń elektrondy sıfrly qoltańbasy (ESQ) bolýy kerek.
«Egemen-aqparat»