Bul týraly QR Úkimetiniń baspasóz ortalyǵynda ótken brıfıngte aıtyldy, dep jazady Egemen.kz.
Prezıdent Joldaýyna sáıkes sharalardy qoldanýdy talap etetin taǵy bir sala — agroónerkásip kesheni.
Úkimet basshysynyń orynbasary atap ótkendeı, agroónerkásiptik keshenniń basty maqsaty — eldiń azyq-túlik qaýipsizdigin qamtamasyz etý.
Aýyl sharýashylyǵy óndirisine aýa raıy faktorlarynyń teris áserin joıý, sondaı-aq mal sharýashylyǵynyń jemshóp bazasyn damytý maqsatynda eginshilikti ártaraptandyrý boıynsha jumys júrgizilýde. Ol úshin jaldaý sharty sheńberinde qabyldanǵan mindettemelerdi oryndaý boıynsha jer paıdalanýshylarynyń jumysyn baqylaý tetikteri ázirlendi.
«Memlekettik retteý sharalary zamanaýı sıfrlyq tehnologııalardy qoldanýǵa, ǵaryshtyq monıtorıng pen jerdi qashyqtan zondtaýǵa negizdelip, memlekettik qoldaý sharalarymen úılestiriletin bolady», dedi Roman Sklıar.
Budan basqa, egis alqaptaryn ártaraptandyrý, aýyl sharýashylyǵynyń jalpy ónimin ulǵaıtý, eńbek ónimdiligin arttyrý, sondaı-aq jerdi utymdy paıdalaný jónindegi talaptardy oryndaý sııaqty qarsy mindettemelerdi kezeń-kezeńimen engizý josparlanǵan. Sonymen qatar jem-shóp daqyldaryn ósirý alańyn keminde 2 ese ulǵaıtý josparlanýda.
Jaıylymdardyń ónimdiligin arttyrý úshin jańa tásilder engiziletin bolady. Osyǵan baılanysty sý arnalaryna rekonstrýksııalaý júrgizilýde.
«2025 jylǵa deıin jalpy uzyndyǵy shamamen 2,3 myń km bolatyn keminde 120 magıstraldyq arnany qaıta jańartýdy júrgizý josparda bar, sondaı-aq taıaý ýaqytta eldiń alty óńirinde jınaqtaý kólemi 1,7 mlrd m3 bolatyn 9 jańa sý qoımasy salynatyn bolady», dep baıandady ol.
Búgingi tańda elimizde shamamen 1,6 mln jeke qosalqy sharýashylyq bar, olar 2020 jyldyń qorytyndysy boıynsha 2,6 trln teńge somasyna aýyl sharýashylyǵy ónimin óndirdi.