Kemel oıdyń kerýeni

Bıyl «Aqıqat» ulttyq qoǵamdyq-saıası jýrnalynyń aqparattyq keńis­tikke shyqqanyna ǵasyr toldy. Qasterli qun­dylyqtarymyzdy nasıhattap, eldi­gimizdi dáriptep, ulttyq kózqarasty qa­lyp­tastyrýdy maqsat tutqan basy­lymnyń mereıli belesi – qalyń qazaqtyń merekesi. Búginde Táýelsiz Qazaqstannyń aqparattyq keńistiginde ózindik brendke aınalǵan jýrnaldyń jemisti eńbegin oıly oqyrman joǵary baǵalaıdy.

«Kemel oıdyń kerýeni» atty kór­mede «Aqıqat» jýrnalynyń negizi qalan­ǵan kúnnen bastap búgingi kúnge deıingi qyz­metiniń damý kókjıeginen syr shertetin tarıhı-tanymdyq, muraǵattyq-aqparattyq derekter men fotosýretter usynylǵan.

Jýrnaldyń shyǵý tarıhy 1921 jy­ly 15 qyrkúıekten bastaý alady. Sol kezde Orynbor qalasynda «Qyzyl Qa­zaqstan» («Krasnyı Kazahstan») atty birinshi nómiri jaryq kórdi. Ár jyl­dary basylym «Aýyl kom­mýnısi», «Kommýnıst», «Qa­zaqstan bol­shevıgi», «Qazaqstan kom­mýnısi» dep atalyp keldi. Tá­ýelsizdik alǵan­nan keıin jýrnal kór­nekti memleket jáne qoǵam qaı­­ratkeri, jýrnaldyń bas redaktory Kamal Smaıylovtyń ıdeıasymen «Aqı­qat» dep ózgertildi.

Tarıhy tereń basylymnyń tuńǵysh re­daktory – Abdolla Asylbekov. Jýrnaldy ár jyldary Smaǵul Sádýa­qasov, Erǵalı Aldońǵarov, Myrzaǵul Atanııazov, Názıpa Quljanova, Nyǵmet Nurmaqov, Sultan Segizbaev, Hamza Jú­sipbekov, Qurmanbek Saǵyndyqov, Ká­kimjan Qazybaev syndy belgili tulǵalar basqarǵan.

Basylym betinde M.Áýezov, S.Seı­fýl­lın, B.Maılın jáne t.b. aqyn-jazý­shylardyń shyǵarmalary tuńǵysh ret jaryq kórgen. Táýelsizdik jyldarynda jýrnalǵa Kamal Smaıylov, Sarbas Aqtaev, Nurmahan Orazbek, Jumabek Ken­­jalın bastaǵan bas redaktorlar je­tek­shilik etip, basylymnyń ón boıy­na azattyǵymyzdyń aıshyqty rýhyn da­rytyp, mazmundyq turǵydan jańasha ser­pin ákeldi. Jýrnaldyń «Qyzyl Qa­zaq­stannan» «Aqıqatqa» deıingi jú­rip ótken joldary ultymyzdyń bir ǵa­syrǵa jýyq tarıhynan syr shertedi. Árbir aıdardaǵy taldamalyq maqalalar, ǵylymı saraptamalar qundy derekter­den turady. Jýr­nal betinde tarıh, ulttyq múdde, qazaq qoǵamynyń damýy, memleketshildik sanany qalyptastyrý, din men dil, ulttyq bolmys, jahandyq máse­leler qozǵalyp, mańyzdy taqyryp­tar oı-sana turǵysynan jan-jaqty tal­danyp, oqyrmanǵa jol tartady. Sonyń ishinde saıasat, tarıh, fılosofııa, ekonomıka, mádenıet jáne fılologııa sa­lalaryndaǵy ózekti taqyryptar qamtylyp keledi.

 «Kemel oıdyń kerýeni» kórmesiniń saltanatty ashylý rásiminde Mem­lekettik ortalyq mýzeı dırektorynyń orynbasary – Bıbigúl Dandyǵaraeva, «Qazaq gazetteri» JShS dırektory – Shám­shıdın Patteev, «Aqıqat» jýr­nalynyń bas redaktory Dáýirjan Tó­lebaev quttyqtaý sóz sóıledi. Sóz sóı­leý­shiler jýrnal redaksııasyn kórmeniń ashylýymen quttyqtap, jýrnaldyń qoǵam úshin ulttyq tarıh pen mádenıetti nasıhattaý isindegi mańyzdylyǵyn atap ótti.

ALMATY