Fýtzaldan álem chempıonatynyń jartylaı fınalynda Qazaqstan quramasy Portýgalııadan jeńildi. Negizgi oıyn 1:1 esebimen aıaqtalyp, qosymsha ýaqytta esep taǵy da 2:2 bolyp teńesti. Jeńimpaz penaltı serııasynda anyqtaldy, dep jazady Egemen.kz.
Negizgi oıyndaǵy alǵashqy goldy portýgalııalyq Anılton Sezar Panı soqty. Ekinshi taımnyń bitýine 40 mınýttaı qalǵanda Qazaqstan quramasynyń fýtbolshysy Dáýren Nurǵojın esepti teńestirdi.
Al qosymsha ýaqytta úshinshi goldy qazaqstandyq fýtbolshy Dýglas salsa, portýgalııalyq Brýný Koelıý esepti teńestirdi.
Quramalar penaltı serııasyna múmkindik aldy. Ol 4:3 esebimen Portýgalııa quramasynyń paıdasyna sheshildi.
Sóıtip Portýgalııa quramasy álem chempıonatynyń fınalyna joldama aldy. Fınalda Argentına quramasymen kezdesedi.
Al Qazaqstan fýtbolshylary 3 qazanda Brazılııa quramasyna qarsy oınap, úshinshi orynǵa talasady.
Matchtan keıin fýtzaldan Qazaqstan quramasynyń bas bapkeri Paýlo Rıkardo Kaka oıyn týraly pikirin aıtty.
«Eki qurama da jaqsy oınady. Biz penaltıde jeńildik. Bul (Portýgalııa quramasynyń jeńisi) – lotereıa emes, oıyn komponenti. … Bizdiń jigitter Brazılııaǵa qarsy oınaıdy. Olar da osal qarsylas emes. Endi eń mańyzdysy – jigitter jaqsy demalyp, kúsh jınaýy kerek», dedi Paýlo Rıkardo Kaka.
Al Qazaqstan quramasynyń qaqpashysy Igıta oıyn týraly bylaı dedi:
«Qurama alańda jeńis úshin bar kúshin saldy, jaqsy oıyn kórsetti. Tek penaltıde sáttilik jetpedi. Alda áli oıyn bar. Qazaqstandyqtarǵa, bizge jankúıer bolýyn toqtatpasyn degim keledi. Bárine alǵysym sheksiz», dedi Igıta.
Aıta keteıik, fýtzaldan Qazaqstan quramasy 2016 jyly álem chempıonatynyń 1/8 fınalynda Ispanııa quramasynan jeńilgen edi.