Bizdiń halyq qyzyq qoı, joq jerden shý shyǵara salady. Tokıodaǵy otandyq sportshylardyń tómen kórsetkishterine bola, sportshylardy bylaı qoıǵanda, sport fýnksıonerlerin, jattyqtyrýshylardy jerden alyp, jerge saldy ǵoı. Qazaqstan 8 qola medal alyp, 83-shi orynda qalyp qoıdy dep shyr-pyr bolady. Qola da bolsa medal ǵoı, bir medal almaǵandar da bar shyǵar tegi. Sóıtse, Tokıo Olımpıadasyndaǵy súreńsizdikke eshkim kináli emes kórinedi. Bar kiná pandemııada?!.
О́tken beısenbide Ulttyq Olımpıada komıtetiniń alqaly jıynyna qatysýshylar osyndaı uıǵarymǵa toqtaldy. Tokıo Olımpıadasyndaǵy ulttyq quramanyń kórsetkishteri saralanyp, oǵan taldaý jasaldy (bul bizdiń pikir, osylaı bolsa degen... biraq taldaý jasalǵan joq). Jıynda negizgi baıandamany jasaǵan Ulttyq Olımpıadalyq komıtettiń hatshysy Andreı Krıýkovtyń pikirine súıensek, otandyq sportshylardyń jeńis tuǵyryna kóterile almaýynyń ózindik sebebi bar. Bárine kináli – eki jyldan beri eldiń eńsesin kótertpegen pandemııa?!.
Atyń óshkir koronavırýstyń kesirinen sportshylardyń jigerin shyńdaıtyn, kórsetkishterin jaqsartatyn 160 jarys ótpeı qalypty. Taǵy da sol indetke bola kóptegen sport túrinen daıarlyqty alty-segiz aıǵa toqtatýǵa týra kelgen. Olımpıada aldyndaǵy daıarlyqty shetelde ótkizýge múmkindik bolmaı, sańlaqtarymyz babyn joǵaltyp, jeńiske degen jigeri muqalǵan. Olımpıadalyq sıkldiń sheshýshi kezeńinde dúbirli jarystardyń bolmaýy sportshylardyń da moraldyq-psıhologııalyq jaǵdaıyna qatty áser etipti. Qytaıdan shyqqan koronavırýs bolmaǵanda, qazaqstandyq sportshylar qytaılyqtardyń ózin shań qaptyryp, eldiń Gımnin san márte shyrqatatyndaı jaǵdaıda eken. Átteń, koronavırýs...
Otandyq sportshylardyń Olımpıadada sátsiz óner kórsetýine ekinshi sebep – bólingen qarjynyń azdyǵy. 2018-2021 jyldary sport salasyn qarjylandyrý 90 paıyzǵa qysqarǵan. Bul óz kezeginde rekordtyq kórsetkishterdiń tómendeýine, sportshylar men bapkerler ynta-yqylasynyń báseńdeýine ákelgen (Olımpıada altyny úshin 250 myń dollar az qarjy bolǵany ma?). Jergilikti bıýdjet arqyly qarjylandyrýdy qosqanda, ulttyq komandalardy memlekettik qazynadan qarjylandyrý bar bolǵany alty paıyz shamasynda eken. Al burynǵy Mádenıet jáne sport vıse-mınıstri Erlan Qojaǵapanovtyń aıtýynsha, Qazaqstan jyl saıyn sportqa 10 mıllıard teńge qarastyrady, al Tokıo men Qytaıdaǵy Olımpıadalarǵa 15 mıllıard teńge qarjy bólingen. Sport salasyna qarjy bólý de pandemııanyń kesirinen qysqaryp ketken shyǵar bálkim?!
Tokıodaǵy sátsizdiktiń úshinshi sebebi – rezervtiń joqtyǵy. Ony qalaı daıarlaıdy, pandemııa alqymnan alyp, qarjysy bar bolǵyr basynan tartsa aıaǵyna jetpeı jatsa... Onyń ústine Ulttyq Olımpıadalyq komıtettiń tujyrymynsha, olımpıadalyq qurama «qartaıyp» bara jatqan kórinedi. Pandemııa bastalǵaly beri (taǵy da pandemııa) olımpıadalyq daıarlaý ortalyqtary jumysyn toqtatqan. Tipti eki jyl ishindegi pandemııalyq shekteýden olımpıadalyq rezervtiń eki býynynan aıyrylyp qalýymyz ǵajap emes eken. Bul degenińiz kelesi Olımpıadalarǵa da kesirin tıgizedi degen sóz...
Pandemııa, pandemııa. Qyzyq, pandemııa degen náýbet jalǵyz Qazaqstannyń basyna ǵana tóngen sııaqty. Quddy álemniń toǵyzynshy terrıtorııasy basqa eldermen baılanys jasamaıtyn, kezinde Robınzo Krýzo mekendegen aralda ómir súrip jatqandaı. Sonaý ótken ǵasyrdyń otyzynshy jyldary Qazaq dalasynda qasaqana asharshylyq jasap, bas kóterer tulǵalaryn qýǵyn-súrginge ushyratyp, atý jazasyna kesken kezi bolsa bir basqa. Al endi «myń ólip, myń tirilgen» qazaqqa kárin tógetindeı, koronavırýsty qazaqqa jiberetindeı Jaratýshyǵa ne jazyp edik? Tutas álemge tóngen koronavırýstyń kesirinen qazaq sporty ǵana zardap shekti degendi qalaı túsinýge bolady?
Sonda deımiz-aý, basqa elderdiń sportshylaryna pandemııa áser etpegen be? Koronavırýs shyqqan Qytaı nege Olımpıadada keremet óner kórsetti, túsiniksiz. Álde koronavırýs ataýlyny moıyndamaǵan Túrikmenstannyń ustanymy durys pa? О́ıtkeni tarıhynda tuńǵysh ret Olımpıadanyń kúmis medalin ıelendi ǵoı túrikmen sportshysy aýyr atletıkadan. Qazaqstandyq sportshylardyń baǵy men baby qatar kelmeýine shynynda da pandemııa kináli shyǵar-daǵy?!
...Tezirek qutylsaq eken pandemııadan...